لاہور : آشیانہ ہاؤسنگ اسکیم اور ایل ڈی اے سٹی اسکینڈل کی تحقیقات میں اہم پیش رفت ہوئی ہے، نیب لاہور نے پنجاب لینڈ ڈیویلپمنٹ کمپنی کے چار افسران کو حراست میں لے لیا۔
تفصیلات کے مطابق آشیانہ ہاؤسنگ اسکیم میں مبینہ کرپشن کا معاملہ مزید الجھ گیا، احد چیمہ نے ایویلوایشن کمیٹی کو ذمہ دار ٹھہرا دیا، احد خان چیمہ کے انکشافات پر نیب حکام نے پنجاب لینڈ ڈویلپمنٹ کے چار افسران کو گرفتار کرلیا۔
انہوں نے بیان دیا تھا کہ کمیٹی نے سارے فیصلے کئے میں نے تو صرف معاملات کو آگے بڑھایا تھا، آشیانہ ہاؤسنگ اور ایل ڈی اے سٹی اسکینڈل سے متعلق مزید انکوائری کے لیے حراست میں لیے گئے افسران میں چیف انجینئر اسرار سعید اور بلال قدوائی شامل ہیں۔
نیب ترجمان کے مطابق امتیاز حیدر اور عارف نامی افسران کو بھی حراست میں لے لیا گیا ہے، زیرحراست افسران سے نیب لاہور کے حکام نے سات گھنٹے تک پوچھ گچھ کی ہے۔ جسمانی ریمانڈ کے لیے ملزمان کو آج احتساب عدالت میں پیش کیا جائے گا۔
مزید پڑھیں: احد چیمہ اورشاہد شفیق 15 روزہ جسمانی ریمانڈ پرنیب کےحوالے
یاد رہے کہ گزشتہ ماہ 21 جنوری کو قومی احتساب بیورو نے سابق ڈی جی ایل ڈی اے احد چیمہ کو بدعنوانی کے الزام میں گرفتار کیا تھا۔
خبر کے بارے میں اپنی رائے کا اظہار کمنٹس میں کریں‘ مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔
