اسلام آباد: وزیر داخلہ احسن اقبال کا کہنا ہے کہ دشمن ہمیں جنونی کے طور پر پیش کرنے کی کوشش کر رہے ہیں۔ سڑکوں پر بیٹھ کر دھرنے دینے سے مذہب سے محبت نہیں کی جاتی، پاکستانی قوم کو مذہب کے نام پر تقسیم کرنا ٹھیک نہیں ہے۔
تفصیلات کے مطابق وزیر داخلہ احسن اقبال کا کہنا تھا کہ دشمن ہمیں جنونی کے طور پر پیش کرنے کی کوشش کر رہے ہیں۔ ہمارا فرض ہے اپنے عمل سے اس بیانیہ کو شکست دیں۔ کچھ عناصر سوشل میڈیا پر کلپس چلا کر دشمنوں کو مواد دے رہے ہیں۔
انہوں نے کہا کہ سڑکوں پر بیٹھ کر دھرنے دینے سے مذہب سے محبت نہیں کی جاتی۔ ختم نبوت ہر مسلمان کاایمان ہے کسی ایک شخص کا مسئلہ نہیں۔ پاکستانی قوم کو مذہب کے نام پر تقسیم کرنا ٹھیک نہیں ہے۔
احسن اقبال نے کہا کہ پاکستانی قوم کو تقسیم کرنے کا فائدہ دشمن قوتیں اٹھاتی ہیں۔ الیکشن میں جانے سے پہلے ملک میں برداشت سے چلنا ہے۔ دشمن کوشش کرے گا الیکشن میں محاذ آرائی کی جائے۔ سیاسی و مذہبی جماعتوں کا فرض ہے درجہ حرارت قابو میں رکھیں۔
وزیر داخلہ نے کہا کہ تاریخ میں دوسری بار اپنے وقت پر الیکشن کروانے جا رہے ہیں۔ غیر ذمہ دارانہ بیان کو عالمی طور پر ہمارے خلاف استعمال کیا جاتا ہے۔ ’دھرنے پاکستان کی ترقی کے خلاف ہیں۔ فیض آباد دھرنا ختم نہ کرتے تو دو مسلک کے فسادات ہوجاتے‘۔
انہوں نے کہا کہ مذہب کے ساتھ نہیں کھیلنا چاہیئے ہمیں اعتدال پر آنا ہے۔
خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔
