نارووال: سابق وفاقی وزیر و رہنما مسلم لیگ (ن) احسن اقبال کا کہنا ہے کہ اگر پی ٹی آئی نے ملک میں انتشار پھیلانے کی کوشش کی تو سختی سے نمٹیں گے۔
تقریب سے خطاب میں احسن اقبال نے کہا کہ الیکشن میں عوام نے تقسیم شدہ مینڈیٹ دیا، پنجاب میں (ن) لیگ کو اکثریت ملی لیکن وفاق میں مخلوط حکومت بنانی پڑی۔
احسن اقبال نے کہا کہ مریم نواز کے وزیر اعلیٰ پنجاب بننے بعد انقلابی کام کریں گے، پی ٹی آئی کو 3 صوبوں نے مسترد کیا جبکہ صرف خیبر پختونخوا میں مینڈیٹ ملا۔
متعلقہ: ایوان صدر سازشوں کا گڑھ بنا ہوا ہے، عطا تارڑ
انہوں نے کہا کہ پی ٹی آئی کے کامیاب نمائندگان قومی اسمبلی میں مثبت کردار ادا کریں، اگر انہوں نے انتشار پھیلانے کی کوشش کی توسختی سے نمٹیں گے، ملکی استحکام اور امن و امان کے ساتھ کسی کو کھیلنے کی اجازت نہیں دیں گے۔
تقریب سے خطاب میں احسن اقبال نے کہا کہ ملک کو معاشی چیلنجز سے سب نے مل کر نکالنا ہے، بانی پی ٹی آئی کا آئی ایم ایف کو خط لکھنے کا دعویٰ ملک کے ساتھ دشمنی ہے۔
ان کا کہنا تھا کہ آئی ایم ایف کو خط لکھ کر امداد رکوانے کی دوسری بار کوشش کی گئی۔
