اسلام آباد: سابق وزیر داخلہ احسن اقبال نے کہا ہے کہ بھارت کی پاکستان پر جارحیت کشمیر کے عوام کی آواز دبانے کے لیے ہے۔
تفصیلات کے مطابق سابق وزیر داخلہ احسن اقبال نے میڈیا سے گفتگو کرتے ہوئے کہا کہ بھارت کے حکمران کشمیر کے عوام کو جبر سے دبانے کی کوشش کررہے ہیں، بھارت پاکستان کی امن کی خواہش کا جواب امن سے دے۔
احسن اقبال نے کہا کہ ہم آج اپوزیشن میں ہیں لیکن اپنی سیاست نہیں پاکستان کا مفاد زیادہ اہم ہے، ہم دیوار بن کر ناپاک جسارت کا مقابلہ کریں گے۔
مسلم لیگ ن کے رہنما نے کہا کہ امن کی خواہش کو کمزوری نہیں سمجھا جائے، دشمن ایسا سمجھا تو وہ جواب دیں گے کہ یاد رکھے گا۔
احسن اقبال نے کہا کہ پاکستان اور بھارت دشمن نہیں، ہمارا دشمن غربت، پسماندگی اور جہالت ہے، بھارت کو پاکستان کی امن کی خواہش کا مثبت جواب دینا چاہئے۔
مزید پڑھیں: پارلیمنٹ میں بھارتی جارحیت کے خلاف متفقہ قرارداد منظور
واضح رہے کہ گزشتہ روز پارلیمنٹ کے مشترکہ اجلاس میں بھارتی جارحیت کے خلاف پیش کردہ قرارداد متفقہ طور پر منظور کرلی گئی تھی۔
مشترکہ قرار داد میں کہا گیا کہ پوراایوان اورقوم پاک فوج کےشانہ بشانہ کھڑی ہے اور بھارتی جارحیت کی شدید مذمت کی جاتی ہے۔
قرار داد میں یہ بھی کہا گیا تھا کہ حریت رہنماؤں کونظربند کیا گیا،کشمیریوں پرظلم کی انتہاکی گئی، بھارتی فوج کی مقبوضہ کشمیرمیں بربریت اورظلم کی مذمت کرتے ہیں۔ مقبوضہ کشمیرپاکستان اوربھارت کے درمیان ایک دیرینہ مسئلہ ہے۔ اس مسئلے کو اقوام متحدہ کی قراردادوں کےمطابق حل کیا جائے۔
