کراچی: جناح انٹرنیشنل ایئرپورٹ پر طیاروں کے قبرستان سے 2 طیارے حیدرآباد منتقل کرنے کا فیصلہ کیا گیا ہے۔
سول ایوی ایشن اتھارٹی نے فیصلہ کیا ہے کہ کراچی ایئرپورٹ پر کئی سال سے موجود 2 ناکارہ طیاروں کو حیدرآباد منتقل کیا جائے گا ، دونوں طیاروں کی حیدرآباد میں سی اے اے کے ٹریننگ سینٹر منتقلی کی کارروائی شروع کر دی گئی۔
ایم ڈی 83 اوربوئنگ 737 ساختہ طیارے ٹریننگ سینٹر کاٹی میں تربیتی مقصد کے لیے رکھے جائیں گے، سول ایوی ایشن اتھارٹی نے طیاروں کی بذریعہ سڑک منتقلی کے لیے ٹینڈر بھی جاری کر دیا۔
سی اے اے کے مطابق 2011 میں کریش لینڈنگ کے باعث اے ایم سی ایئرلائن کا میکڈنل ڈگلس 83 ساختہ طیارہ کراچی ایئرپورٹ پر موجود ہے، سابقہ انڈس ایئرلائن کا بوئنگ 737 ساختہ طیارہ بھی فنی خرابی کے باعث کئی برس سے ناکارہ کھڑا ہے۔
واضح رہے کہ درجنوں ناکارہ طیاروں کی موجودگی کے باعث کراچی ایئرپورٹ کو طیاروں کا قبرستان کہا جاتا ہے۔
