The news is by your side.

Advertisement

عائشہ فاروقی ترجمان دفتر خارجہ مقرر

اسلام آباد: عائشہ فاروقی کو ترجمان دفتر خارجہ مقرر کردیا گیا جس کا باضابطہ نوٹیفکیشن جاری کردیا گیا ہے۔

تفصیلات کے مطابق ہیوسٹن میں پاکستان کی سابق قونصل جنرل عائشہ فاروقی کو ترجمان دفتر خارجہ مقرر کردیاگیا، انہوں نے بطور ترجمان دفتر خارجہ عہدے کا چارج سنبھال لیا۔

عائشہ فاروقی امریکی شہر ہیوسٹن میں پاکستان کی قونصل جنرل رہ چکی ہیں اور انہیں ڈاکٹر فیصل کی جگہ ترجمان دفتر خارجہ تعینات کیا گیا ہے۔

عائشہ فاروقی بطور سفارتکار فرانس، مصر، برطانیہ، ترکی اور امریکا میں خدمات انجام دے چکی ہیں اس کے علاوہ وہ وزارت خارجہ میں بھی ذمہ داریاں نبھا چکی ہیں۔

مزید پڑھیں: ترجمان دفتر خارجہ ڈاکٹر محمد فیصل جرمنی میں پاکستانی سفیر نامزد

واضح رہے کہ چند روز قبل پاکستان نے 21 ممالک کے سفیروں، ہائی کمشنروں اور قونصل جنرلز کے تبادلے کیے تھے، ڈاکٹر فیصل کو جرمنی میں پاکستان کا سفیر نامزد کیا گیا تھا۔

دفتر خارجہ کے مطابق رحیم حیات قریشی ایران میں پاکستان کے سفیر جبکہ شفقت علی خان روس میں پاکستانی سفیر کی ذمہ داریاں ادا کریں گے۔

اس کے علاوہ ایڈیشنل سیکرٹری محمد ندیم خان کو یونان، جرمنی میں سفیر جوہر سلیم کو اٹلی، ڈی جی یورپ ملک محمد فاروق کو پولینڈ، برلن میں موجود مریم مدیحہ آفتاب کو بلغاریہ جب کہ ترکی میں تعینات منسٹر سید علی اسد گیلانی کوازبکستان میں سفیر تعینات کیا گیا تھا۔

Comments

یہ بھی پڑھیں