اسلام آباد : وزیر مملکت ڈاکٹر عائشہ غوث پاشا کا کہنا ہے کہ ہم نے آئی ایم ایف پروگرام میں رہ کر سیاسی قیمت ادا کی ہے ، پوری کوشش ہے کہ آئی ایم ایف کے ساتھ معاہدہ ہو جائے۔
تفصیلات کے مطابق وزیر مملکت ڈاکٹر عائشہ غوث پاشا نے میڈیا سے گفتگو کرتے ہوئے کہا آئی ایم ایف کے ساتھ رابطے میں ہیں، پروگرام جاری رکھنا چاہتے ہیں اور اس کو مکمل کرنے کے لیے آگے بڑھ رہے ہیں۔
عائشہ غوث پاشا کا کہنا تھا کہ ہم نے آئی ایم ایف پروگرام میں رہ کر سیاسی قیمت ادا کی ہے اور پوری کوشش ہے کہ آئی ایم ایف کے ساتھ معاہدہ ہو جائے۔
بجٹ کے حوالے سے وزیر مملکت نے کہا کہ بجٹ کی تیاری چل رہی ہے، بجٹ نمبرز کو حتمی شکل دے رہے ہیں، جون کے پہلے ہفتے میں بجٹ پیش کیا جائے گا۔
ان کا کہنا تھا کہ ٹیکس نیٹ میں اضافہ کرنا ملک کی ضرورت ہے، ٹیکس ٹو جی ڈی پی جب تک ڈبل ڈیجٹ نہیں ہوتا مشکل صورتحال رہے گی۔
ڈاکٹر عائشہ غوث پاشا نے مزید کہا کہ اسمگلنگ پر قابو پا کر ٹیکس نیٹ میں اضافہ کیا جائے گا، اس ضمن میں پالیسی سطح پر کام کیا جا رہا ہے، بجٹ خسارے پر قابو پانا ہی عوام کے لیے بڑا ریلیف ہو گا۔
وزیر مملکت کا کہنا تھا کہ مشکل معاشی حالات میں بھی عوام کو ریلیف دینے کی پوری کوشش کریں گے۔
