لاہور: سینئر سیاست دان اعتزاز احسن نے شہباز شریف کو نواز شریف کے لیے قربانی کا بکرا قرار دے دیا ہے۔
تفصیلات کے مطابق بیرسٹر اعتزاز احسن نے ایک بیان میں کہا کہ شکاری بکرا باندھ کر شیر کو لالچ دیتا ہے، جیسے ہی شیر بکرے کو کھانے آتا ہے شکاری اس کا شکار کر لیتا ہے، اسی طرح نواز شریف نے اسٹیبلشمنٹ کے لیے شہباز شریف کو آگے رکھا ہوا ہے۔
اعتزاز احسن کا کہنا تھا نواز شریف گھات لگا کر بیٹھے ہیں، اور شہباز شریف کو بہ طور چارہ ڈالا ہوا ہے، گولی شکار کو لگے یا شہباز کو، نواز شریف کو کوئی پرواہ نہیں۔
اعتزاز احسن کے مطابق ن لیگ میں اس بات پر شدید اختلاف ہے کہ وزیر اعظم شہباز شریف بنےگا یا مریم نواز۔
انھوں نے کہا حکومت میں اگر صلاحیت کا فقدان ہے تو اپوزیشن بھی ایسی ہی ہے، نواز شریف تب واپس آئیں گے جب انھیں قید سے مکمل تحفظ دیا جائے گا، وہ قید کو برداشت ہی نہیں کر سکتے۔
سپریم کورٹ میں اعتزاز احسن کے بھنگ سے متعلق واقعے پر قہقے
اعتزاز احسن نے دعویٰ کیا کہ نواز شریف بغیر ڈیل کے واپس نہیں آئیں گے، لیکن شریف خاندان کے ساتھ ڈیل یا این آر او کا کوئی امکان نہیں ہے۔
ان کا کہنا تھا کہ عمران خان کا سب کچھ اس بات پر لگا ہوا ہے کہ شریف خاندان کو این آر او نہیں دیں گے، اگر ڈیل نہ ہوئی تو نواز شریف کبھی واپس نہیں آئیں گے، آئے تو جیل جائیں گے۔
