اسلام آباد : پیپلز پارٹی کے رہنما اور ممتاز قانون دان اعتزاز احسن نے کہا ہے کہ پرویزالٰہی کو کل وزارت اعلیٰ سے نہیں ہٹایا جاسکتا، تاہم ایک دن میں دو اجلاس بھی ہوسکتے ہیں۔
یہ بات انہوں نے اے آر وائی نیوز کے پروگرام آف دی ریکارڈ میں میزبان کاشف عباسی سے خصوصی گفتگو کرتے ہوئے کہی۔
انہوں نے کہا کہ یہ کہنا کہ غلط ہے کہ گورنر اسمبلی کا اجلاس نہیں بلاسکتا، ایک دن میں 2،2 اجلاس بھی ہوسکتے ہیں، تاہم عجلت میں اس طرح کے فیصلے نہیں ہونے چاہئیں۔
اعتزاز احسن کا کہنا تھا کہ متعدد ارکان اسمبلی ملک سے باہر ہوتے ہیں اس لیے عجلت میں ایسا نہیں کرنا چاہیے، آئین کہتا ہے کہ پرائیوٹ ممبرز ڈے پر بھی اجلاس بلایا جاسکتا ہے۔ ،
پیپلزپارٹی کے رہنما نے کہا کہ پرویزالٰہی کو کل وزارت اعلیٰ سے نہیں ہٹایا جاسکتا، کوئی کسی کو اس طرح اٹھا کر باہر نہیں کرسکتا، کل کا اجلاس بلانا فساد پیدا کرنے کے مترادف ہے۔
ایک سوال کے جواب میں اعتزاز احسن کا کہنا تھا کہ اسمبلی میں تحریک عدم اعتماد اور اعتماد کے ووٹ کے دونوں اجلاس ایک ہی دن ہوسکتے ہیں۔
مزید پڑھیں: پنجاب اسمبلی کا اجلاس جمعہ تک ملتوی
پنجاب اسمبلی کا اجلاس شروع ہونے کے تھوڑی دیر بعد ہی ملتوی کردیا گیا، اسمبلی کا اجلاس ساڑھے 4گھنٹے کی تاخیر سے شروع ہوا، اجلاس کی صدارت اسپیکر سبطین خان کررہے تھے۔
اپوزیشن اراکین نے اسمبلی اجلاس شروع ہوتے ہی کورم کی نشاندہی کردی۔ اسپیکر کی جانب سے 15منٹ کا دیا جانے والا وقت گزر جانے کے باوجود اسمبلی کورم پورا نہ ہو سکا، جس کے بعد اسپیکر پنجاب اسمبلی نے اجلاس جمعہ تک ملتوی کردیا۔
