لاہور : پیپلز پارٹی کے رہنما اعتزاز احسن نے کہا ہے کہ ارشد شریف کے قتل اور عمران خان پر حملے کی سازش کے الزام کے بعد نواز شریف کے لیے ملک واپس آنا مشکل ہوچکا ہے۔
تفصیلات کے مطابق ماہر قانون اعتزاز احسن نے لاہور ہائی کورٹ کے باہرمیڈیا سے گفتگو کرتے ہوئے کہا کہ نوازشریف پر لندن سے بیٹھ کر سازش کرنے کا الزام لگا ، سازش کے تحت ارشد شریف کو قتل پھر عمران خان کو گولیاں ماری گئیں۔
اعتزاز احسن کا کہنا تھا کہ نواز شریف کے لئے ملک واپس آنا مشکل ہوچکا ہے، لندن پولیس نواز شریف پر ارشد شریف کے قتل اور عمران خان پر حملے میں ملوث ہونے کے الزام کو سنجیدگی سے دیکھ رہی ہے۔
ماہر قانون نے خبردار کیا اسکاٹ لینڈ پر ذرا سا بھی دباؤ نوازشریف کے لیے خطرناک ہوجائے گا اور پھر نوازشریف کیلئے پاکستان آنا اور لندن میں رہنا مشکل ہوجائے گا۔
اعتزاز احسن نے مشورہ دیا ہے کہ مسلم لیگ نون کو چاہیے کہ اگر وہ ارشد شریف کے کیس میں ملوث نہیں تو لندن میں تسنیم حیدر کے خلاف ہتک عزت کا دعوی دائر کرے۔
انھوں نے کہا کہ نواز شریف سعودی عرب میں پناہ لے لیں تو الگ بات ہیں ، ن لیگ اے آر وائی نیوزکو بھی انتقام کا نشانہ بناتی ہے ، ن لیگ کبھی کہتی ہے اےآروائی نیوز غلط خبریں دیتا ہے ، کبھی مریم نواز اے آروائی نیوزکا مائیک اٹھا دیتی ہیں۔
استعفوں کی منظور کے حوالے سے ماہر قانون کا کہنا تھا کہ 35 استعفے منظور کرنے سے لگتا ہے مسلم لیگ نواز تو بلکل گھبرا گئی ہے۔
اعتزاز احسن نے کہا کہ عمران خان قومی اسمبلی میں نہیں جا سکتے، عدالت سٹرکوں پر آسکتے ہیں، اب وفاق اور پنجاب میں اکٹھے الیکشن نہیں ہوسکتے ہیں۔
