فیصل آباد: غیرت کے نام پر قتل کیس کا ملزم آکاش مسیح جھلس کر ہلاک ہو گیا۔
پولیس حکام نے پنجاب کے شہر فیصل آباد میں غیرت کے نام پر ایک شخص کو قتل کرنے والے ملزم آکاش مسیح سے متعلق کہا ہے کہ وہ آگ میں جھلسنے کے بعد زخموں کی تاب نہ لا کر ہلاک ہو گیا ہے۔
پولیس حکام کے مطابق آکاش مسیح نے اپریل میں بلال مسیح کو والدہ سے تعلق کے شبہ میں قتل کر دیا تھا، تھانہ سٹی سمندری میں آکاش اور اس کی والدہ طاہرہ کے خلاف مقدمہ بھی درج ہوا۔
واقعے کے بعد سے آکاش مسیح مفرور تھا، اس دوران وہ ایک پرانی رنجش پر اپنے ماموں کے گھر کو آگ لگانے پہنچ گیا، تاہم گھر کو آگ لگاتے ہوئے ملزم آکاش اور اس کا دوست خود جھلس کر شدید زخمی ہو گئے۔
پولیس کا کہنا ہے کہ ڈی ایچ کیو اسپتال میں دونوں ملزمان نے اپنے بیان میں بتایا کہ وہ گوجرانوالہ کے رہائشی ہیں اور انھوں نے ماموں کے گھر کو جلانے کے لیے سگریٹ کے ذریعے پٹرول میں آگ بھڑکائی۔
پولیس حکام کے مطابق آگ لگاتے ہوئے 70 فی صد جھلسنے والا آکاش برن وارڈ میں دم توڑ گیا ہے۔
