بالی ووڈ کے معروف اداکار اکشے کمار نے انکشاف کیا ہے کہ فلمسازوں نے انہیں کئی بار مالی طور دھوکا دیا ہے۔

بالی ووڈ کے معروف اداکار اکشے کمار نے پیشے کے دوران مالی دھوکا دہی کا سامنا کرنے سے متعلق انکشاف کیا، اکشے کمار نے میڈیا سے گفتگو میں کہا کہ انہیں دھوکہ دہی نہیں پسند لیکن وہ اس کا نشانہ ضرور بن چکے ہیں۔

اکشے کمار نے بتایا کہ میں نے اپنے کریئر کے دوران متعدد بار مالی طور پر دھوکا کھایا ہے اور یہ دھوکا کسی اور نے نہیں بلکہ فلم کے پروڈیوسرز نے دیا ہے۔

اداکار کا مزید کہنا تھا کہ دھوکا کھانے کے بعد میں اس شخص سے بات ہی نہیں کرتا، چپ ہو جاتا ہوں اور سائیڈ میں نکل جاتا ہوں، ایک دو پروڈیوسر نے میرے معاوضے کی ادائیگی نہیں کی ہے، یہ صرف اور صرف دھوکا ہے۔

واضح رہے کہ اکشے کمار آج کل اپنی حالیہ فلم ’سرفیرا‘ کی تشہیر میں مصروف ہیں جو کہ 12 جولائی کو ریلیز ہوئی تھی۔