بالی ووڈ کے معروف اداکار اکشے کمار کی فلموں کے لیے اپنا نام تبدیل کرنے کے پیچھے کی دلچسپ وجہ سامنے آگئی۔
کیا آپ جانتے ہیں کہ نامور اداکار اکشے کمار کا اصل نام راجیو اوم بھاٹیا ہے لیکن انہیں پوری دنیا ’’اکشے کمار‘‘ کے نام سے جانتی ہے۔ ویسے تو شوبز انڈسٹری میں نام بدل کر فلموں میں کام کرنا کوئی حیران کن بات نہیں لیکن اکشے کمار کے نام بدلنے کے پیچھے کافی دلچسپ وجہ ہے۔
بھارتی میڈیا کے مطابق اکشے کمار نے اپنے حالیہ انٹرویو میں بتایا کہ میں نے مہیش بھٹ کی ہدایتکاری میں بننے والی فلم ‘آج’ سے بالی ووڈ میں اپنے کیریئر کا آغاز کیا تھا، اس فلم سے پہلے تک میرا نام ‘اکشے کمار’ نہیں بلکہ راجیو بھاٹیہ تھا لیکن میں نے فلم کے ہیرو کے نام سے متاثر ہوکر اپنا نام تبدیل کرلیا تھا۔
اکشے کمار نے کہا کہ میں نے فلم کی شوٹنگ کے دوران ہیرو کمار گورو سے اُن کا فلمی نام پوچھا تھا جس پر اداکار نے بتایا کہ فلم میں اُن کا نام اکشے ہے، پھر میں نے انہیں بتایا کہ میں اپنا نام اکشے ہی رکھنا چاہتا ہوں۔
اداکار نے کہا کہ اس طرح مجھے اپنی پہلی فلم سے اپنا نام اکشے ملا اور میرا خیال ہے کہ بہت کم لوگ ہی یہ جانتے ہوں گے کہ میرا اصل نام راجیو ہے، راجیو ایک اچھا نام ہے اور مجھے لگتا ہے کہ شاید میرا نام راجیو گاندھی کے نام پر رکھا گیا تھا لیکن میں نے یہ نام تبدیل کردیا۔
