ہالی ووڈ کے آسکر ایوارڈ یافتہ اداکار ال پچینو 82 سال کی عمر میں ایک بار پھر باپ بننے والے ہیں، ان کے چوتھے بچے کی ماں نوجوان پروڈیوسر 29 سالہ نور الفلاح ہوں گی۔
غیر ملکی میڈیا رپورٹس کے مطابق فلم ’گاڈ فادر‘ کے ہیرو ال پچینو نے منگل کو یہ اعلان کر کے اپنے مداحوں کو شدید طور پر حیران کر دیا ہے کہ نور الفلاح ان کے بچے کی ماں بننے والی ہیں۔
ال پچینو اور نور الفلاح اپریل 2022 سے ایک دوسرے کے ساتھ رہ رہے ہیں، معمر اداکار نے بتایا کہ نور کا حمل آٹھویں ماہ میں ہے، اداکار کی ٹیم کے ایک نمائندے نے بتایا کہ بچے کی پیدائش کسی بھی وقت متوقع ہے۔
ال پچینو کے پہلے ہی 3 بچے ہیں، 2 بیورلی ڈی اینجیلو سے اور ایک اداکارہ جان ٹارنٹ سے، کہا جا رہا ہے کہ جب تک نیا آنے والا بچہ ہائی اسکول سے فارغ ہوگا، ال پچینو کی عمر 100 سال ہو چکی ہوگی۔
واضح رہے کہ نور الفلاح کویتی امریکی ہیں، ان کے والد کویتی اور ماں امریکی ہیں، اس سے قبل ان کے تعلقات 2017 میں لیجنڈری موسیقار مک جیگر سے بھی رہے، انھوں نے کالج میں فلم کی تعلیم حاصل کی، یونیورسٹی آف سدرن کیلیفورنیا کے اسکول آف سنیمیٹک آرٹس سے اپنی انڈرگریجویٹ ڈگری حاصل کی، اور UCLA سے فلم اور ٹی وی پروڈکشن میں ماسٹر کی ڈگری حاصل کی ہے۔ انھوں نے بلی نائٹ، لٹل ڈیتھ، اور بروسا نوسٹرا فلمیں پروڈیوس کیں۔
