فلسطین تحریکِ مزاحمت ‘حماس’ کے عسکری وِنگ ‘عزالدین القسام بریگیڈ’ کی جانب سے اعلان کیا گیا ہے کہ غزّہ کی پٹّی کے جنوبی شہر خان یونس کے مائن فیلڈ کو اُڑادیا گیا ہے، حملے میں متعدد اسرائیلی فوجی ہلاک اور زخمی بھی ہوئے ہیں۔
بین الاقوامی خبر رساں ادارے کی رپورٹ کے مطابق القسام بریگیڈ کا اپنے بیان میں کہنا ہے کہ خان یونس کے مشرقی علاقے ‘الفخاری’ میں پہلے سے تیار شدہ باردوی سرنگ فیلڈ کو تباہ کردیا گیا ہے، جس کے باعث بڑی تعداد میں اسرائیلی فوجی ہلاک اور زخمی ہوئے ہیں۔
حماس’ کے عسکری وِنگ القسام بریگیڈ کے مطابق اسرائیلی فوج کی دو عسکری ٹرانسپورٹ گاڑیوں، ایک ‘میرکاوا ‘ٹینک اور 2 عدد ‘ڈی9’ فوجی بلڈوزروں کو علاقے میں داخل ہوتے دیکھا گیا ہے۔
واضح رہے کہ اسرائیل، 7 اکتوبر سے غزّہ پر جاری حملوں میں 17 ہزار بچوں اور 11 ہزار 378 عورتوں سمیت کُل 41 ہزار 615 فلسطینیوں کو موت کی نیند سلا چکا ہے، جبکہ اسرائیلی حملوں میں زخمی ہونے والے فلسطینیوں کی تعداد 96 ہزار 359 ہے۔
دوسری جانب گزشتہ رات ایران کی جانب سے اسرائیل پر کئے گئے میزائل حملے کے بعد ایرانی وزیر خارجہ عباس عراغچی کا کہنا ہے کہ اسرائیل نے مزید جوابی کارروائی کی تو بھر جواب دیا جائے گا، اسرائیل پر ایران کا حملہ مکمل ہوگیا ہے۔
ایرانی وزیر خارجہ عباس عراغچی کا سماجی رابطوں کی ویب سائٹ ایکس پر اپنے ایک بیان میں کہنا تھا کہ ایران نے اسرائیل کے خلاف اپنے دفاع کا استعمال کیا۔
اسرائیل پر میزائلوں کی بارش، نیتن یاہو کا رد عمل سامنے آگیا
اُن کا کہنا تھا کہ ہم نے اپنا جوابی حملہ کرنے سے قبل دو ماہ تک انتظار کیا کہ شاید غزہ میں جنگ بندی ہو جائے۔
ایرانی وزیر خارجہ نے کہا کہ ایران کی کارروائی ختم ہو چکی ہے تاہم اگر اسرائیل مزید جوابی کارروائی کرتا ہے تو اس کا جواب بھرپور اور اس سے بھی زیادہ طاقت سے دیا جائے گا۔
انہوں نے کہا کہ ایران نے اپنے دفاع کا حق استعمال کرتے ہوئے حملہ کیا، ایرانی حملے میں غزہ اور لبنان پر حملوں کیلئے استعمال ہونے والے اڈوں اور عسکری تنصیبات کو نشانہ بنایا گیا۔
