پاکستانی امپائر علیم ڈار ایک اور اعزاز اپنے نام کرتے ہوئے دنیائے کرکٹ کے پہلے امپائر بن گئے۔
پاکستانی امپائر علیم ڈار انٹرنیشنل کرکٹ میں 25 سال امپائرنگ کرنے والے دنیائے کرکٹ کے پہلے امپائر بن گئے ہیں، انہوں نے فروری 2000 میں ڈیبیو کیا تھا۔
علیم ڈار گزشتہ روز بارش سے متاثرہ پاکستان اور نیوزی لینڈ کے ٹی ٹوئنٹی میچ میں احس رضا کےساتھ فیلڈ امپائِرنگ پینل کا حصہ تھے۔ جب وہ میدان میں اترے تو اس وقت امپائرنگ میں انہیں مجموعی طورپر 25 سال اور 2 ماہ ہوچکے تھے۔
علیم ڈار تین سال آئی سی سی کے بہترین امپائر قرار پائے، کئی آئی سی سی ایونٹس میں ذمہ داریاں نبھائیں۔
انٹرنیشنل کرکٹ کونسل کی طرف سے علیم ڈار نے 2009، 2010 اور 2011 میں دنیا کے بہترین امپائرکا ایوارڈ وصول کیا۔
19 سال وہ لگاتار آئی سی سی ایلیٹ پینل کا حصہ رہے، علیم ڈار کو 6 بار دنیا کے بہترین امپائرز کے لیے نامزد کیا گیا۔2008 میں انہیں ایشین کرکٹ کونسل نے بہترین امپائر قرار دیا۔
واضح رہے کہ ریکارڈ 551 انٹرنیشنل میچز سپروائز کرنے کا اعزاز بھی علیم ڈار کو حاصل ہے۔
