اسلام آباد: بانی پاکستان تحریک انصاف (پی ٹی آئی) کی ہمشیرہ علیمہ خانم اپنا نام یگزٹ کنٹرول لسٹ (ای سی ایل) سے نکالنے کی درخواست پر سماعت کے دوران روسٹم پر آگئیں۔
اسلام آباد ہائیکورٹ میں عمران خان کی بہن علیمہ خانم کا نام ای سی ایل سے نکالنے کی درخواست پر سماعت جسٹس خادم حسین سومرو نے کی۔ اس موقع پر اسسٹنٹ اٹارنی جنرل عظمت بشیر تارڑ اور ایف آئی اے ڈپٹی ڈائریکٹر عدالت پیش ہوئے۔
اسسٹنٹ اٹارنی جنرل نے بتایا کہ ڈی آئی جی راولپنڈی پولیس کی سفارش پر علیمہ خانم کا نام ای سی ایل میں ڈالا گیا، ان کے خلاف تھانہ صادق آباد میں دہشتگردی دفعات کے تحت مقدمہ ہے۔
یہ بھی پڑھیں: بانی پی ٹی آئی خود علیمہ خانم سے ملنا نہیں چاہتے، حنیف عباسی
رانا مدثر ایڈووکیٹ نے کہا کہ ہم نے مقدمات کی تفصیلات فراہمی کیلیے درخواست دائر کی تھی، ہمیں نہیں بتایا گیا کہ علیمہ خانم کا نام ای سی ایل میں ہے۔
اس دوران علیمہ خانم روسٹرم پر آگئیں۔ عمران خان کی بہن نے کہا کہ پنجاب پولیس نے لیٹر دیا کہ میں اشتہاری ہوں، یہاں بیٹھتی ہوں آپ ڈی آئی جی کو بلوائیں مجھے گرفتار کریں۔
اس پر جسٹس خادم حسین سومرو نے کہا کہ آپ کی لیگل ٹیم کھڑی ہے۔ علیمہ خانم نے کہا کہ جب تک ڈی آئی جی نہیں آتے میں آپ کی عدالت سے نہیں جاؤں گی۔
جسٹس خادم حسین سومرو نے کہا کہ ڈی آئی جی اسلام آباد ہوتے تو بلا لیتا یہ پنجاب پولیس کے ڈی آئی جی ہیں۔
عدالت نے استفسار کیا کہ اسلام آباد کے کسی کیس میں مطلوب ہیں کیا؟ تو سرکاری وکیل نے بتایا کہ ہمارے علم میں ایسا کچھ نہیں ہے۔
جسٹس خادم حسین سومرو نے سرکاری وکیل سے مکالمہ کرتے ہوئے کہا کہ درخواست گزار کو درست معلومات نہیں دے رہے آپ نے پولیس کو بھی پارٹی نہیں بنایا، اپنے کلائنٹ کو مکمل معلومات دیں۔
انہوں نے کہا کہ ہم نے ایک ہفتے میں آپ کی ساری پٹیشن سنی ہے، ہم نے قانون کے دائرے میں رہ کر کام کرنا ہے، پنجاب پولیس اسلام آباد ہائیکورٹ کے دائرہ اختیار میں نہیں آتی، 26ویں آئینی ترمیم کے بعد جس کی استدعا آپ نے درخواست میں نہیں کی وہ ہم نہیں کر سکتے۔
اسلام آباد ہائیکورٹ نے درخواست پر سماعت آئندہ ہفتے کیلیے ملتوی کر دی۔
