الجزائر کے صدر نے پارلیمنٹ کے ایوان زیریں کو تحلیل کر کے قبل از وقت انتخابات کا اعلان کردیا، صدر عبدالمجید تبون نے کہا کہ ہم جلد ہی پارلیمانی انتخابات کا آغاز کریں گے۔
غیر ملکی خبر رساں ادارے کے مطابق شمالی افریقی ملک الجزائر کے صدر عبدالمجید تبون نے پارلیمنٹ کو تحلیل کردیا ہے اور جلد از جلد پارلیمانی انتخابات کا اعلان کیا ہے۔
جزائری ٹیلیویژن پر نشر ہونے والے قوم سے اپنے خطاب میں عبدالمجید تبون نے کہا کہ میں نے قومی ایوان نمائندگان کو تحلیل کرنے کا فیصلہ کیا ہے ان کا کہنا تھا کہ ہم جلد ہی انتخابات کا آغاز کریں گے۔
صدر نے کہا کہ انتخابات کے ذریعہ نوجوان طبقے کو پارلیمنٹ میں داخل ہونے کا موقع میسر آئے گا۔ عبدالمجید تبون نے آئندہ چند دنوں میں حکومتی عہدوں میں ردو بدل کا بھی اعلان کرتے ہوئے مزید کہا کہ متعدد وزراء کی کارکردگی انتہائی خراب رہی ہے۔
قابل ذکر بات یہ ہے کہ الجزائر میں گزشتہ پارلیمانی انتخابات مئی2017 میں ہوئے تھے جبکہ نئے الیکشن کا شیڈول سنہ 2022 کا ہے۔
