پشاور: پاکستان تحریک انصاف کی جانب سے صوبہ خیبر پختونخوا کے وزیر اعلیٰ کیلیے نامزد امیدوار علی امین گنڈاپور کا کہنا ہے کہ میری پاکستان بھر کے کیسز میں ضمانت ہو چکی ہے۔
اے آر وائی نیوز سے خصوصی گفتگو میں علی امین گنڈاپور نے کہا کہ جلد پشاور کا دورہ کر کے پارلیمانی پارٹی اجلاس بلاؤں گا، خیبر پختونخوا کو ویلفیئر صوبہ بنا کر امن و امان کی صورتحال بہتر کروں گا۔
علی امین گنڈاپور نے واضح کیا کہ اداروں کو اعتماد میں لیں گے اور اعتماد دیں گے، اداروں کے ساتھ کوئی غلط فہمی نہیں چاہتے۔
رہنما پی ٹی آئی نے بتایا کہ صوبے میں صحت انصاف کارڈ فوری شروع کریں گے جبکہ لنگر خانے اور پناہ گاہیں بھی دوبارہ شروع کریں گے، لنگر خانوں اور پناہ گاہوں کو اوورسیز پاکستانی چلائیں گے اس میں حکومتی وسائل استعمال نہیں ہوں گے۔
انہوں نے کہا کہ بانی پی ٹی آئی کی ہدایت کے مطابق فلاحی کاموں کو فروغ دیا جائے گا، مالی مشکلات کے حل کی کوششیں شروع ہیں مسائل ختم ہو جائیں گے۔
ان کا کہنا تھا کہ عوام، سرکاری ملازمین اور پولیس اہلکاروں کو اعتماد میں لے کر مسائل حل کریں گے، صوبے سے غربت کے خاتمے کیلیے بھرپور اقدامات کریں گے۔
علی امین گنڈاپور نے بتایا کہ تمام اراکین اسمبلی سے رابطے میں ہوں، باہمی مشاورت سے پالیسیاں بنائیں گے۔
