پشاور: وزیر اعلیٰ خیبر پختونخوا علی امین گنڈاپور کا کہنا ہے کہ میں پورے صوبے کا نمائندہ ہوں، مجھے کسی سے کلیئرنس کی ضرورت نہیں۔
پشاور ہائیکورٹ میں میڈیا سے بات کرتے ہوئے وزیر اعلیٰ خیبر پختونخوا علی امین گنڈاپور کا کہنا تھا کہ جو اوچھے ہتھکنڈے استعمال کررہے ہیں کیا انکی کلیئرنس ہے۔
انہوں نے کہا کہ سول نافرمانی شروع کرنے کیلئے بانی پی ٹی آئی کے حکم کا انتظار ہے، بانی پی ٹی آئی جب بتائیں گے تب سول نافرمانی تحریک شروع ہوگی
وزیر اعلیٰ خیبر پختونخوا کا مزید کہنا تھا کہ مجھے کل بانی پی ٹی آئی سے ملاقات نہیں کرنے دی گئی۔
دوسری جانب گزشتہ روز وزیر دفاع خواجہ آصف کا کہنا تھا کہ مذاکرات کرنا ہیں تو پہل بانی پی ٹی آئی کو کرنا ہوگی۔
نجی ٹی وی چینل سے گفتگو کرتے ہوئے وزیر دفاع خواجہ آصف نے کہا کہ لوگوں نے شور مچایا ہوا ہے مجھے کسی مذاکرات کا نہیں پتا، پارٹی میں مذاکرات کرنے والے وزیر بھی لاعلم ہیں۔
انہوں نے کہا کہ اگر مذاکرات کرنا ہوں تو چپ رہتے ہیں زبان نرم کرتے ہیں۔
’فیض حمید تنہا نہیں تھا قمر باجوہ بھی ساتھ تھا، ٹرائل ہونا چاہیے‘
وزیر دفاع نے کہا کہ پی ٹی آئی حکومت کو بتائے کہ ہم مذاکرات کرنا چاہتے ہیں، اسپیکر کے ذریعے مذاکرات کا عمل شروع ہونا چاہیے، پی ٹی آئی پہلے رابطہ کرے گی اس کے بعد ہم کوئی جواب دینے کی پوزیشن میں ہوں گے۔
