اسلام آباد: خیبر پختونخوا کے وزیر اعلیٰ علی امین گنڈاپور نے کہا ہے کہ پی پی کارکنوں پر شیلنگ ان کے حکم پر نہیں، بلکہ ریڈ زون کے ایس او پیز کے مطابق ہوئی۔
اسلام آباد ہائیکورٹ میں پیشی کے موقع پر وزیر اعلیٰ کے پی نے کہا پیپلز پارٹی نے ریڈ زون میں داخل ہونے کی کوشش کی، ریڈ زون کے اپنے ایس او پیز ہوتے ہیں جس کے تحت ان پر شیلنگ کی گئی۔
علی امین گنڈاپور نے کہا بانی پی ٹی آئی نے ہمیں سوچ دی ہے کہ سیاسی جماعتوں کو احتجاج کرنے دینا چاہیے، جے یو آئی نے 15 ماہ میں 5 جلسے کیے، جس کے لیے ہم نے سیکیورٹی دی، لیکن ریڈ زون میں گھستے وقت انھیں روکا گیا۔
پی ٹی آئی کے کیمپ کو آگ لگانے پر مقدمہ درج
وزیر اعلیٰ نے کہا میرے حکم پر شیلنگ نہیں ہوئی ریڈزون ایس او پیز کے مطابق ہوئی ہے، پیپلز پارٹی بہت جمہوری حکومت بنتی ہے، اس نے ذوالفقار علی بھٹو کو سیاسی طور پر بھی مار دیا ہے، بانی پی ٹی آئی پر کوئی کیس نہیں ہے، انھیں بے گناہ جیل میں ڈالا گیا ہے، اب یہ پی ٹی آئی کا مینڈیٹ چوری کر کے یہاں بیٹھے ہیں، اور جن کے کہنے پر یہ چل رہے ہیں انھوں نے پہلے ملک میں مارشل لا لگایا۔
علی امین گنڈاپور نے کہا آئی ایم ایف نے خیبرپختونخوا کی تعریف کی ہے، ہم نے اپنے اہداف حاصل کر لیے ہیں، ہماری حکومت کا 200 بلین سے زائد کا سرپلس ہے، سندھ اور بلوچستان میں پیپلز پارٹی کے وزیر اعلیٰ ہیں وہاں سر پلس کیوں نہیں آیا؟ جب کہ خیبر پختونخوا نے کوئی قرضہ نہیں لیا۔
