پشاور: وزیر اعلیٰ خیبر پختونخوا علی امین گنڈاپور کا کہنا ہے کہ پہلے مجھ میں تنقید کی برداشت بہت کم تھی لیکن وقت کے ساتھ اب بڑھ گئی ہے۔
پریس کلب کابینہ کی حلف برداری تقریب سے خطاب کرتے ہوئے علی امین گنڈاپور نے کہا کہ صحافت ایک بہت ہی ذمہ داری والا شعبہ ہے، جب سے ہماری حکومت آئی ہے صحافی برادری کو اپنا بھائی سمجھا ہے، ہم نے صحافی بھائیوں کو میرٹ پر گرانٹ دی ہے۔
یہ بھی پڑھیں: علی امین گنڈاپور کے استعفے سے متعلق پارٹی کا اہم فیصلہ
علی امین گنڈاپور نے کہا کہ میں پیچھے کی طرف جانے پر فوکس نہیں کرتا آگے جاتا ہوں، غلطی سے سیکھنے والا عقل مند آدمی ہوتا ہے، رائے قائم کرنے سے پہلے انسان کو سوچنا چاہیے، جو سوچ سمجھ کر بات کرتے ہیں ان کی بات پر سوالیہ نشان نہیں آتا۔
انہوں نے کہا کہ بانی پی ٹی آئی عمران خان نے کہا تھا کہ اپنی ساکھ پر کبھی سمجھوتہ نہیں کرنا، ہم نے بہت لڑائیاں کی ہیں اس کا انجام بھی دیکھا ہے۔
وزیر اعلیٰ کے پی نے مزید کہا کہ جب صوبوں کا موازنہ نہیں ہوگا تو پتا نہیں چلے گا کون کیا کر رہا ہے؟ صحافیوں سے کہتا ہوں چینل پر صوبوں کی کارکردگی سے متعلق پروگرام رکھیں، ایک شخص ہر صوبے سے آئے اور پوچھیں جس بندے کو ووٹ دیا وہ کام کیا کر رہا ہے۔
ان کا کہنا تھا کہ سیاست عبادت ہے لیکن آج اس طرح پیش کیا جا رہا ہے کہ صرف کرپشن ہے، صحافت کو حق اور سچ کیلیے استعمال کرنا چاہیے اپنی ذات کیلیے نہیں، ہم نے اپنی غلطیوں سے سیکھ کر آگے بڑھنا ہے اور بہتری لانی ہے۔
علی امین گنڈاپور نے کہا کہ معیار کو قائم کرنے کیلیے اصولوں پر سمجھوتا نہیں کرنا چاہیے، خیبر پختونخوا حکومت نے 49 فیصد ریونیو بڑھایا ہے۔
