کراچی : اپوزیشن لیڈرسندھ اسمبلی علی خورشیدی کا کہنا ہے کہ کے الیکٹرک کراچی کے عوام کیلئے بھارت سے کم نہیں، جیسی بھارت کے خلاف کارروائی ہوئی کے الیکٹرک کےخلاف بھی کی جائے۔
تفصیلات کے مطابق اپوزیشن لیڈر سندھ اسمبلی علی خورشیدی کی جانب سے بیان میں کہا گیا کہ شہری ایم کیو ایم کے اراکین اسمبلی سےرابطہ کرتے ہیں، لوگ مسائل سےایم کیوایم اراکین اسمبلی کوآگاہ کرتے ہیں۔
اپوزیشن لیڈر سندھ اسمبلی کا کہنا تھا کہ مقامی، صوبائی یا وفاقی حکومت ہو کراچی کےمسائل پر بے حس نظر آتی ہے، کے الیکٹرک انتظامیہ ایم این ایز،ایم پی ایزکی بات سننے کو تیار نہیں، کے ای 16 سے 18 گھنٹے کی لوڈشیڈنگ کررہی ہے۔
انھوں نے مطالبہ کیا کہ کے الیکٹرک کراچی کے عوام کیلئے بھارت سے کم نہیں، جیسی بھارت کے خلاف کارروائی ہوئی کےالیکٹرک کے خلاف بھی کی جائے۔
مزید پڑھیں : جو پیسے پورے دے رہے ہیں انھیں بجلی دینا کے الیکٹرک کی ذمہ داری ہے، سعید غنی
رہنما ایم کیو ایم نے کہا کہ بجلی چوری روکنے کی ذمے داری کے الیکٹرک کی ہے جس میں وہ ناکام ہوئی، وفاقی وزیر توانائی آئے تھے وہ کچھ بھی نہیں کر رہے۔
ان کا مزید کہنا تھا کہ مزدور جب رات میں آتا ہے تو بجلی بند ہوتی ہے، بھارت نے رات میں حملہ کیا کے الیکٹرک بھی رات میں حملہ کرتی ہے، وفاقی حکومت کی ذمہ داری ہے کے الیکٹرک کیخلاف کارروائی کرے۔
