لاہور : ملک کے معروف گلوکار اور اداکار علی ظفر کی اپنی والدہ کے پاؤں دباتے ہوئے ویڈیو سوشل میڈیا پر وائرل ہوگئی، صارفین کی جانب سے بہت پسند کیا جارہا ہے۔
تفصیلات کے مطابق پاکستان کے معروف گلوکار و اداکار علی ظفر کے چھوٹے بھائی، دانیال ظفر نے سوشل میڈیا پر ایک ویڈیو اپلوڈ کی ہے جسے صارفین کی جانب سے خوب سراہا جارہا ہے۔
مختصر ویڈیو اور تصاویر کی ایپ انسٹا گرام پر دانیال ظفر کی شیئر کی گئی ویڈیو میں دیکھا جاسکتا ہے کہ وہ اپنے بڑے بھائی علی ظفر اور والدہ کے ساتھ بیٹھے ٹی وی دیکھ رہے ہیں۔
انسٹا اسٹوری میں علی ظفر اپنی والدہ کے پاؤں دبا رہے ہیں اور یہ تینوں مل کر رمضان کے دوران نجی چینل پر نشر ہونے والی دانیال ظفر کی اسپیشل سیریز دیکھ رہے ہیں جبکہ دانیال ظفر بغیر پوچھے اور بتائے بڑے بھائی اور والدہ کی ویڈیو بنا رہے ہیں۔
معلوم ہونے پر علی ظفر ویڈیو میں دانیال سے کہہ رہے ہیں کہ ویڈیو بنانے سے پہلے پوچھ تو لیا کرو جبکہ ان دونوں فنکاروں کی والدہ کو بھی اچانک اپنی ویڈیو بننا کچھ خاص پسند نہیں آیا اور وہ کیمرے سے منہ چھپا رہی ہیں۔
دانیال اور علی ظفر کی یہ فیملی ویڈیو دیکھتے ہی دیکھتے خوب وائرل ہو گئی ہے جس پر اُن کے مداح دانیال کی اداکاری کی اور علی ظفر کے والدہ کے پاؤں دبانے پر خوب تعریفیں کررہے ہیں۔
