کراچی: پولیس نے سابق وفاقی وزیر اور رہنما پی ٹی آئی علی زیدی کی رہائشگاہ کو سب جیل قرار دے دیا ہے۔
محکمہ داخلہ سندھ کی جانب سے جاری بیان کے مطابق پاکستان تحریک انصاف کے گرفتار رہنما علی زیدی کی رہائشگاہ کو سب جیل قرار دے دیا گیا ہے، علی زیدی کو کچھ دیر بعد ڈیفنس میں واقع رہائشگاہ منتقل کیا جائے گا۔
سب جیل قرار دئیے جانے کے بعد علی زیدی کی رہائشگاہ کے اطراف پولیس کی بھاری نفری کو تعینات کردیا گیا ہے۔
پی ٹی ۤآئی رہنما کا کہنا تھا کہ والدہ کا گھر سب جیل ڈیکلیر کرتے ہوئے یہاں منتقل کردیا گیا ہے، مجھے اس تھانے میں رکھا گیا جو میری وزارت کا حصہ تھا۔
علی زیدی کا کہنا تھا کہ سیاسی مخالفت شدید ہےاور رہےگی، مگر مخالفت کو ذاتیات میں بدل دیاگیا، عمران خان پرہرقسم کےکیس بنادیئےگئےجن کا کوئی سرپیرنہیں، پی ٹی آئی کی پوری قیادت کوجیلوں میں ڈال دیاگیاہے۔
یہ بھی پڑھیں: فواد چوہدری کی گرفتاری اور نظر بندی کے خلاف کیس میں اہم پیشرفت
اس سے قبل محکمہ داخلہ سندھ نےعلی زیدی تیس روز کے لیےنظر بند کرتے ہوئے ان کی کسٹڈی جیکب آباد جیل سپرنٹنڈنٹ کے حوالے کی تھی۔
محکمہ داخلہ کا موقف تھا کہ ایم پی او تھری کے تحت علی زیدی کی نظر بندی کے احکامات جاری کیے، ان پر لوگوں کو سڑکیں بلاک کرنے اور دھرنے کےلیے اکسانے کا الزام ہے۔
واضح رہے کہ علی زیدی کو نو مئی کو کراچی کے علاقے کالا پل سے گرفتار کیا گیا تھا، وہ چیئرمین پی ٹی آئی عمران خان کی گرفتاری کے خلاف احتجاجی مظاہرے میں شریک تھے۔
