فیصل آباد: انسداد دہشتگردی عدالت (اے ٹی سی) نے رہنما پاکستان تحریک انصاف (پی ٹی آئی) عالیہ حمزہ کی 9 مئی کے مقدمات میں ضمانت منظور کر لی۔
عالیہ حمزہ کو انسداد دہشتگردی عدالت میں پیش کیا گیا جہاں ان کی 9 مئی کے چاروں مقدمات میں عبوری ضمانت منظور کی گئی۔ عدالت نے انہیں پیر کو دوبارہ طلب کر لیا۔
عدالت میں میڈیا سے مختصر گفتگو میں پی ٹی آئی رہنما کا کہنا تھا کہ ہم تمام مقدمات کا سامنا کریں گے، جلسے کیلیے پُرجوش تھے مگر بانی کے حکم پر پیچھے ہٹ گئے۔
انہوں نے کہا کہ لیڈر نے جلسہ کرنے کا کہا تو ہم سب باہر نکلیں گے، سانحہ 9 مئی پر بانی نے مطالبہ کیا ہے اوپن ٹرائل کیا جائے۔
گزشتہ روز اسلام آباد ہائیکورٹ کے جسٹس میاں گل حسن اورنگزیب نے عالیہ حمزہ کی مقدمات میں 15 روز کیلیے حفاظتی ضمانت کی درخواست منظور کی تھی۔
دوران سماعت جسٹس میاں گل حسن اورنگزیب نے ان کے وکیل سے استفسار کیا تھا کہ وہ کتنے دن جیل میں رہیں؟ وکیل نے بتایا تھا کہ میری مؤکلہ نے 15 ماہ اور 6 دن جیل میں گزارے۔
عدالت نے استفسار کیا تھا کہ آپ کو کتنے دن چاہئیں؟ وکیل نے استدعا کی تھی کہ ہمیں دو ہفتے کا وقت دے دیں۔ عالت نے عالیہ حمزہ کی 15 روز کی حفاظتی ضمانت منظور کرتے ہوئے پولیس کو ان کی گرفتاری سے روک دیا تھا۔
عدالت نے حکم دیا تھا کہ عالیہ حمزہ 15 روز میں متعلقہ عدالت میں پیش ہوں۔
جون میں انسداد دہشتگردی عدالت نے پی ٹی آئی رہنما صنم جاوید اور عالیہ حمزہ سمیت 7 ملزمان کے قابل ضمانت وارنٹ گرفتاری جاری کیے تھے۔
