پاکستانی اداکارہ علیزے شاہ نے اداکارہ منسا ملک کی جانب سے لگائے گئے الزامات کو مسترد کرتے ہوئے کہانی کے دوسرے رخ کو سامنے رکھا ہے۔
اداکارہ علیزے شاہ نے فوٹو اینڈ ویڈیو شیئرنگ ایپ انسٹاگرام پر عائشہ جہانگیر ملک نامی صارف کی اسٹوری کا اسکرین شارٹ بطور ثبوت پیش کیا اور لکھ کہ ’’ سچ کبھی چھپتا نہیں‘‘۔
اسٹوری میں انہوں نے منسا کے لگائے گئےجسمانی تشدد کے الزامات سے پردہ اُٹھادیا۔سیٹ پر موجود ایک عینی شاہد عائشہ کے مطابق منسا ملک نے سب سے پہلے علیزے شاہ کو تھپڑ مارا جس کے بعد معاملات بڑھ گئے۔
تفصیلی نوٹ میں عائشہ جہانگیر ملک نے واقعے کی حقیقت سے آگاہ کرتے ہوئے کہا کہ ’یہ واقعہ شام 6 بجے کے قریب پیش آیا تھا میں اس وقت عملہ اور ساتھی فنکار علیزے کے ساتھ تھی، سیٹ پر موجود پہلے منسا کی جانب سے علیزے کو تھپڑ مارا گیا تھا اور جسمانی تشدد کا نشانہ بنایا گیا تھا۔
عائشہ نے علیزے کے حق میں مزید لکھا کہ ’ان سب واقعات کے بعد بھی علیزے نے اپنی شوٹنگ مکمل کی اور اخلاقیات کا درس دیا۔’
انہوں نے مزید لکھا کہ ’برائے مہربانی آپ لوگ سوشل میڈیا پر جو کچھ بھی دیکھتے ہیں دوسرے فریق کی کہانی سنے بغیر اس پر یقین نہ کیا کریں۔’
یاد رہے کہ گزشتہ دنوں سے یہ خبریں سوشل میڈیا پر گردش کر رہی ہیں جس میں اداکارہ منسا ملک نے علیزے شاہ پر جسمانی تشدد کے الزامات عائد کیے تھے۔
ان الزامات میں منسا ملک کا کہنا تھا کہ علیزے شاہ نے جلتا ہوا سگریٹ ان پر پھینکا اور جسمانی تشدد کا نشانہ بھی بنایا ، بعد ازاں منسا کی جانب سے علیزے کے خلاف ایف آئی آر بھی درج کرائی گئی تھی۔
جس میں منسا ملک نے کہا تھا کہ ’علیزے شاہ کو ان سے پروفیشنل جیلسی ہے جس کی بنا پر علیزے کی جانب سے انہیں سنگین نتائج کی دھمکیاں دی گئی ہیں‘۔
