ممبئی: بالی ووڈ کے نامور فلمساز کرن جوہر نے اُن کی نقل اُتارنے والے کامیڈین کیتن سنگھ کو آڑے ہاتھوں لے لیا۔
بھارتی میڈیا کے مطابق حال ہی میں بھارت کے کامیڈی شو ’میڈنیس مچائیں گے انڈیا کو ہنسائیں گے‘ کا پرومو آن ائیر ہوا جس میں کامیڈین کیتن سنگھ نے فلمساز کرن جوہر کی نقل اُتاری تھی۔
پرومو دیکھ کر کرن جوہر نے مایوسی کا اظہار کرتے ہوئے اپنے آفیشل انسٹاگرام ہینڈل کی اسٹوری میں کامیڈی شو کا نام لیے بغیر نوٹ جاری کیا۔
کرن جوہر نے کہا کہ میں اپنی ماں کے ساتھ بیٹھا ٹیلی ویژن دیکھ رہا تھا تو اسی دوران میرے سامنے ایک قابل احترام چینل کے ریئلیٹی کامیڈی شو کا پرومو آیا جس میں ایک شخص غیر معمولی ذوق میں میری نقل کر رہا تھا۔
View this post on Instagram
فلمساز نے کہا کہ میں اپنے ناقدین اور بے نام لوگوں سے اس طرح کی حرکت کی توقع رکھتا تھا لیکن جب میری اپنی ہی انڈسٹری کے لوگ میرے خلاف ایسی حرکتیں کریں گے تو مجھے ضرور دُکھ ہوگا۔
کرن جوہر نے مزید کہا کہ مجھے اس انڈسٹری میں کام کرتے ہوئے 25 سال سے زائد کا عرصہ ہوچکا ہے، میری ہی انڈسٹری کے لوگ میری بےعزتی کر رہے ہیں، یہ دیکھ کر مجھے غصہ تو نہیں آتا لیکن دُکھ ضرور ہوتا ہے۔
واضح رہے کہ اس کامیڈی شو میں بالی ووڈ اداکارہ ہما قریشی بھی موجود تھیں جو کرن جوہر کی نقل اُتارنے پر کامیڈین کیتن سنگھ کو سراہا رہی تھیں۔
دوسری جانب کامیڈین کیتن سنگھ نے ٹائمز ناؤ کو ایک انٹرویو میں بتایا کہ میرا ارادہ کرن کو تکلیف پہنچانا کبھی نہیں تھا، میں کرن جوہر سے معافی مانگنا چاہتا ہوں، میں ان کے کام اور ان کے شو کا بہت بڑا مداح ہوں، میرا مقصد انہیں تکلیف پہنچانا نہیں تھا۔
