نیویارک: ذرایع نے کہا ہے کہ مقبوضہ کشمیر کی صورت حال پر اقوام متحدہ کی سیکورٹی کونسل کا اجلاس بلانے کے لیے تمام 15 رکن ممالک متفق ہو گئے ہیں۔
تفصیلات کے مطابق یو این سیکورٹی کونسل کا مقبوضہ کشمیر پر اجلاس بلانے کے لیے تمام رکن ممالک نے اتفاق رائے کر لیا ہے۔
ذرایع کا کہنا ہے کہ مستقل ارکان میں فرانس کے سوا سب نے پاکستان کے مؤقف کی حمایت کی ہے۔
ذرایع کے مطابق چین، روس اور برطانیہ نے پاکستانی مؤقف کی حمایت کی، روس نے پہلی بار سیکورٹی کونسل اجلاس میں پاکستان کی حمایت کی۔
برطانیہ نے انسانی حقوق کی خلاف ورزیوں پر تحقیقات کا بھی مطالبہ کیا ہے، مقبوضہ کشمیر کی موجودہ صورت حال کے تناظر میں امریکا سمیت کسی ملک نے بھارت کی حمایت نہیں کی۔
یہ بھی پڑھیں: کشمیر کے اسٹیٹس کا فیصلہ یو این چارٹر کے مطابق ہوگا: سیکرٹری جنرل یو این
یاد رہے کہ پاکستان کی درخواست پر 16 اگست کو مسئلہ کشمیر پر سیکورٹی کونسل کا ہنگامی اجلاس بھی طلب کیا گیا تھا۔
اس سے قبل اقوام متحدہ کے سیکریٹری جنرل نے مقبوضہ کشمیر کی صورت حال پر اہم ترین بیان دیتے ہوئے کہا تھا کہ کشمیر کے اسٹیٹس کا فیصلہ یو این چارٹر کے مطابق ہوگا۔
اقوام متحدہ کے سیکریٹری جنرل نے مقبوضہ کشمیر میں انسانی حقوق کی خلاف ورزی پر تشویش کا اظہار کرتے ہوئے کہا کہ ہم وادی کی صورت حال کا جائزہ لے رہے ہیں۔
