لندن : برطانیہ میں بیروزگاری اور مہنگائی کی شرح میں اضافے کے بعد معروف ریٹیل چین (سپر اسٹورز) ولکو لمیٹڈ نے بھی اپنے مراکز بند کرنے کا عندیہ دے دیا۔
برطانیہ میں جہاں بڑی کمپنیوں کی طرف سے ملازمتیں اور کاروبار ختم کرنے کا عندیہ دیا جا رہا ہے۔ وہیں ولکو لمیٹڈ کے بارے میں بھی یہی کہا جارہا ہے کہ وہ اگلے ماہ برطانوی مارکیٹ سے غائب ہوجائے گا۔
غیرملکی خبر رساں ادارے کی رپورٹ کے مطابق ٹریڈ یونین جی ایم بی کے رہنما نے میڈیا سے گفتگو میں کہا کہ برطانوی ریٹیل چین ولکو لمیٹڈ مختلف گھریلو سامان کی فروخت کا بڑٖا ادارہ ہے، اس کے 400 ہوم ویئر اسٹورز کا سلسلہ بند ہونے سے ادارے کی ساڑھے 12 ہزار ملازمتیں بھی ختم ہوجائیں گی۔
View this post on Instagram
جی ایم بی یونین رہنما نے ولکو کے منتظمین کا حوالہ دیتے ہوئے کہا کہ مذکورہ اسٹورز اکتوبر کے اوائل تک جبکہ دو دیگر مراکز اگلے ہفتے جمعہ کو بند ہوجائیں گے جس کا مطلب ہے کہ اب تمام ساڑھے 12 ہزار ملازمین کے بےروزگار ہونے کا قوی امکان ہے۔
واضح رہے کہ ولکو لمیٹڈ نے1930 میں وسطی انگلینڈ میں ہارڈ ویئر اسٹور کے طور پر اپنے کاروبار کا آغاز کیا تھا، یہ ادارہ برطانیہ کے سخت معاشی ماحول اور مالی بحران کے سبب تنزلی کی جانب تیزی سے گامزن ہوا، اس کے علاوہ ناکامی کی بڑی وجہ بلند افراطِ زر اور شرح سود میں اضافہ بھی قرار دیا جارہا ہے۔
دوسری جانب اس حوالے سے جب ولکو لمیٹڈ کے منتظمین سے ان کا مؤقف جاننے کیلئے رابطہ کیا گیا تو ان کی جانب سےدرخواست کا فوری طور پر کوئی جواب نہیں دیا گیا۔
