لاہور: جماعت اسلامی کے مرکزی سیکرٹری جنرل لیاقت بلوچ نے کہا ہے کہ کشمیریوں پر بھارتی مظالم کے خلاف حکومت خاموش ہے اس لیے جماعت اسلامی نے مظلوم کشمیری بھائیوں سے اظہار یکجہتی اور قومی اتفاق رائے پیدا کرنے کے لیے 29جولائی کو آل پارٹیز کانفرنس بلانے کا فیصلہ کیا ہے۔
آل پارٹیزکانفرنس میں تمام سیاسی و مذہبی جماعتوں کی قیادت اور سول سوسائٹی کے اہم رہنماﺅں کو دعوت دی جائے گی جس کے لیے خود امیر جماعت اسلامی سیاسی قیادتوں سے رابطے کرینگے ۔
ان خیالات کا اظہار انہوں نے لاہور پریس کلب میں پریس کانفرنس سے خطاب کرتے ہوئے کیا، لیاقت بلوچ نے کہا کہ بھارتی مظالم کے خلاف 31 جولائی کو ناصر باغ سے واہگہ بارڈر تک کشمیر مارچ ہو گا جبکہ 4آگست کو کراچی میں خواتین اپنے کشمیری بھائیوں اور بہنوں سے اظہار یکجہتی کرینگے ۔
لیاقت بلوچ نے کہا کہ کشمیر میں بھارتی مظالم اور بھارتی حکومت کی انا خطے میں خوفناک جنگ کا سبب بن سکتی ہے اس لیے مسلم دشمنی پر مبنی انسانی حقوق کی تنظیموں کو اپنا کردار ادا کرنا چاہیے۔
مزید پڑھیں: آل پارٹیز کانفرنس: سراج الحق کی خورشید شاہ اورعمران خان سے ملاقات
انہوں نے کہا کہ پاکستانی قیادت اور پالیسی ساز بھارت سے جھوٹی دوستی کے نام پر ان کی چالوں میں آکر الجھ جاتے ہیں اور پھر منہ کی کھاتے ہیں، اس لیے حکومت کشمیر پر واضع مؤقف اختیار کرے اور کشمیر کے حل اور بھارتی مظالم بند ہونے تک بھارت سے تمام تعلقات ختم کیے جائیں۔
ایک سوال کے جواب میں لیاقت بلوچ نے کہا کہ تحریک انصاف کی 7 آگست سے شروع ہونے والی کرپشن کے خلاف تحریک مظلوم کشمیریوں کے لیے فائدہ مند ثابت ہو سکتی ہے۔
انہوں نے کہا کہ عمران خان کی اس تحریک کے دباﺅ میں آکر شاید حکومت مقبو ضہ کشمیر کے مسلئے پر کوئی واضع موقف اختیار کرلے۔
