کراچی : پاکستان پیپلزپارٹی کی جانب سے وزیراعلیٰ ہاؤس میں مردم شماری پر منعقدہ آل پارٹیز کانفرنس میں آج پچیس سے زائد سیاسی ، مذہبی اور قوم پرست پارٹیوں کے رہنماؤں نے مطالبہ کیا ہے کہ سندھ میں آباد ، غیر ملکیوں اور دوسرے صوبوں سے آنے والے افراد کو مردم شماری میں الگ الگ رکھا جائے۔
وزیر اعلیٰ سندھ سید قائم علی شاہ کی زیرصدارت ہونے والی کانفرنس میں ایم کیوایم،مسلم لیگ فنکشنل ، مسلم لیگ ن،قومی عوامی تحریک ،جماعت اسلامی ،سندھ یونائیٹڈ پارٹی،سندھ ترقی پسند پارٹی،جمعیت علمائے پاکستان،جمعیت علمائے اسلام سمیت دیگر جماعتوں کے رہنماؤں نے خطاب کیا۔
اس موقع پروزیر اعلیٰ سندھ نے کہا کہ کوشش کریں گے کہ سندھ کی آبادی کا توازن نہ بگڑے، سندھ کے مفادات پر کوئی سودے بازی نہیں کریں گے۔
وفاق سے مطالبہ کرتے ہیں کہ مردم شماری کرائے،سندھ کی سیاسی جماعتوں کا مردم شماری پر جو موقف ہوگا وہی متفقہ موقف ہوگا۔
مردم شماری کے مسئلے پر مشترکہ مفادات کی کونسل پر بات کریں گی،سندھ کی تمام سیاسی جماعتوں کا شکریہ ادا کرتا ہوں جو سندھ حکومت کی دعوت پر کانفرنس میں شریک ہوئیں۔ مردم شماری کے مسئلے پرسندھ کی عوام کے موقف کے ساتھ ہیں۔
