اسلام آباد :سینیٹ کی 30 نشستوں پر انتخابات کیلئے پولنگ آج ہوگی ، سندھ ،خیبرپختونخوا،پنجاب اور قومی اسمبلی کےارکان حق رائے دہی استعمال کریں گے۔
تفصیلات کے مطابق سینیٹ انتخابات کیلئے پولنگ آج ہوگی ، پولنگ صبح 9 سے 4 بجےتک جاری رہے گی۔
سندھ ،خیبرپختونخوا،پنجاب اور قومی اسمبلی کےارکان حق رائے دہی استعمال کریں گے، 30 نشستوں پر59 امیدوارمقابل ہیں۔
وفاقی دارالحکومت کی ایک جنرل اور ایک ٹیکنوکریٹ نشست پر انتخاب ہوگا ، اسلام آباد سے رانا محمودالحسن اور فرزند حسین شاہ امیدوار ہیں جبکہ ٹیکنوکریٹ کی نشست کیلئے اسحاق ڈار اور راجہ انصر محمود مقابل ہیں۔
پنجاب کی 2 خواتین اور 2 ٹیکنوکریٹ اور ایک غیرمسلم نشست پر ، سندھ اور خیبرپختونخوا کی 7،7 جنرل نشستوں پر انتخاب ہوگا۔
اس کے علاوہ سندھ اور خیبرپختونخوا کی دو،دو خواتین،دو،دو ٹیکنوکریٹ کی نشستوں پرانتخابات ہوں گے ، سندھ کی ایک غیرمسلم نشست پر بھی انتخاب ہوگا۔
18 امیدوار بلامقابلہ منتخب ہوچکے ہیں، پنجاب اور بلوچستان کی 7،7 جنرل نشستوں پرامیدوار بلامقابلہ کامیاب ہوگئے ہیں جبکہ خواتین کی 2 اور ٹیکنوکریٹ کی 2 نشستوں پربھی امیدوار بلامقابلہ کامیاب ہوئے۔
سینیٹ انتخابات کیلئے دو کالم اور چار رنگوں کے بیلٹ پیپرز چھاپے گئے، جنرل نشستوں کیلئے سفید رنگ،ٹیکنوکریٹ کیلئے سبز رنگ کے بیلٹ پیپرہوں گے ، خواتین کی نشستوں کیلئے گلابی اور غیر مسلم نشستوں کیلئےپیلے رنگ کے بیلٹ پیپرز ہوں گے۔
