آج شاعر مشرق، حکیم الامت ڈاکٹر علامہ محمد اقبال کا یوم وفات ہے، ملک بھر میں آج اقبال کی 87 ویں برسی عقیدت و احترام کے ساتھ منائی جا رہی ہے۔
صدر آصف علی زرداری نے علامہ اقبال کو خراج عقیدت پیش کرتے ہوئے کہا ہے کہ ان کے افکار، فلسفہ، شاعری ہمارے لیے مشعل راہ ہے، ہمیں پیغام اقبال پر عمل پیرا ہونے کی ضرورت ہے۔
صدر مملکت آصف زرداری نے اقبال کے یوم وفات پر پیغام میں کہا ہم ان کی سیاسی، فکری خدمات کو خراج تحسین پیش کرتے ہیں، وہ شاعر کے علاوہ مفکر اور مصلح بھی تھے، علامہ اقبال نے ملت اسلامیہ کے زوال کا درد محسوس کیا، اور امت کو بیدار کرنے کے لیے افکار و اشعار کو ذریعہ بنایا۔
صدر نے کہا اقبال کی شاعری خودی، اجتہاد، عشق حقیقی، حریت فکر جیسے تصورات پر محیط ہے، اقبال کے نزدیک امت مسلمہ کی نجات فکری و روحانی بیداری میں مضمر ہے، ہمیں سماجی، معاشی اور فکری چیلنجز سے نمٹنے کے لیے اقبال کی تعلیمات کو مشعل راہ بنانا ہوگا۔
وزیر اعظم محمد شہباز شریف کا پیغام
وزیر اعظم شہباز شریف نے ڈاکٹر علامہ محمد اقبال کو خراج عقیدت پیش کرتے ہوئے کہا وہ پاکستان کے نظریاتی معمار اور پہلے مفکر تھے، علامہ اقبال نے برصغیر کے مسلمانوں کے لیے ایک الگ وطن کا تصور پیش کیا، اور مسلمانوں کو سیاسی، فکری اور روحانی طور پر متحد کیا۔
شہباز شریف نے کہا علامہ اقبال کے فلسفہ خودی نے اور شاعری نے تحریک پاکستان کو نظریاتی بنیاد فراہم کی، اور علم، یقین محکم اور خود اعتمادی پر زور دیا جو آج بھی ہماری تمام مشکلات کا حل ہے، علامہ اقبال نے نوجوانوں کو شاہین قرار دیتے ہوئے حصول علم اور اعلیٰ اخلاقی اقدار اپنانے کی تقلید کی۔
