اسلام آباد: سینئر رہنما مسلم لیگ (ن) ایاز صادق کا کہنا ہے کہ متحدہ قومی موومنٹ پاکستان نے اسپیکر، ڈپٹی اسپیکر اور وزیر اعظم کے ووٹ کیلیے یقین دہانی کروا دی۔
اتحادی جماعتوں کے وفد نے اتحادی جماعت ایم کیو ایم پاکستان کے وفد سے ملاقات کی۔ وفد میں ایاز صادق، علیم خان، صادق سنجرانی، یوسف گیلانی، خورشید شاہ اور خالد مگسی شامل تھے۔
ایاز صادق نے کہا کہ اتحادیوں نے ایم کیو ایم پاکستان کے رہنماؤں سے ملاقات کی ہے، انہوں نے اسپیکر، ڈپٹی اسپیکر اور وزیر اعظم کے ووٹ کیلیے یقین دہانی کروائی، آگے بھی سب کے ساتھ مل کر چلنے کی خواہش کا اظہار کیا ہے۔
انہوں نے بتایا کہ صدر اور چیئرمین سینیٹ کے ووٹ کیلیے پھر سے ایم کیو ایم کے پاس آئیں گے، ایم کیو ایم کے بلدیاتی آئینی ترمیم سے متعلق مطالبے کو تسلیم کیا ہے اور ان کے مطالبے پر اتحادی دوستوں کے ساتھ بیٹھ کر لائحہ عمل بنائیں گے۔
ان کا کہنا تھا کہ لوگوں کی بہتری کیلیے سینیٹ اور قومی اسمبلی کا پلیٹ فارم استعمال کریں گے۔
اس موقع پر کنوینر ایم کیو ایم خالد مقبول صدیقی نے کہا کہ جمہوریت ایک تسلسل کے ساتھ آگے بڑھ رہی ہے، ثمرات عوام تک بھی پہنچنے چاہییں جس کیلیے آئین کی مدد لینے کی کوشش کی۔
خالد مقبول صدیقی نے کہا کہ آئین کے مطابق عوام کے حقوق کیلیے جگہ اور گنجائش ہونی چاہیے، مسلم لیگ (ن) نے اتفاق کیا ہم جمہوریت کو ڈی ریل نہیں ہونے دینا چاہتے۔
انہوں نے کہا کہ جب تک عوام کی شرکت جمہوریت میں نہیں ہوگی یہ مضبوط نہیں ہوگی، ہم نے وعدہ کیا ہے کہ ووٹ کریں گے۔
