برسبین: آسٹریلوی ویمن کرکٹ ٹیم کی وکٹ کیپر الیسا ہیلی نے ٹی ٹوینٹی انٹرنیشنل میں وکٹ کے پیچھے شکار کرنے کا مہندر سنگھ دھونی کا عالمی ریکارڈ توڑ دیا۔
تفصیلات کے مطابق آسٹریلیا اور نیوزی لینڈ ویمن کرکٹ ٹیم کے مابین ٹی ٹوینٹی سیریز جاری ہے اور برسبین کے ایلن بارڈر فیلڈ میں کھیلا گیا میچ آسٹریلوی وکٹ کیپر الیسا ہیلی کے عالمی ریکارڈ کی وجہ سے یادگار بن گیا۔
الیسا ہیلی نے ٹی ٹوینٹی فارمیٹ میں وکٹ کے پیچھے سب سے زیادہ کھلاڑیوں کو آؤٹ کرکے سابق بھارتی کپتان اور وکٹ کیپر مہندر سنگھ دھونی کا ریکارڈ توڑ دیا۔
آسٹریلوی خاتون وکٹ کیپر الیسا ہیلی نے کرکٹ کے مختصر ترین فارمیٹ میں وکٹ کے پیچھے 92 کھلاڑیوں کو آؤٹ کرکے یہ اعزاز اپنے نام کیا، دھونی نے ٹی ٹوینٹی انٹرنیشنل میچز میں وکٹ کے پیچھے 91 شکار کیے ہیں۔
Alyssa Healy now holds the record for most wicketkeeping dismissals in men's or women's T20Is 🙌 #AUSvNZ
(h/t @_hypocaust) pic.twitter.com/PJaa83KBKT
— ESPNcricinfo (@ESPNcricinfo) September 27, 2020
دھونی نے بھارت کی جانب سے یہ ریکارڈ 97 اننگز میں بنایا تھا جبکہ آسٹریلیا کی الیسا ہیلی نے 99 اننگز میں یہ سنگ میل عبور کیا۔
واضح رہے کہ دھونی آئی پی ایل میں چنئی سپر کنگز کی جانب سے کھیل رہے ہیں اور انہوں نے رواں برس 15 اگست کو انٹرنیشنل کرکٹ سے ریٹائرمنٹ کا اعلان کیا تھا۔