کراچی: پاکستانی شوبز انڈسٹری کی معروف ماڈل علیزے گبول کرونا وائرس کا شکار ہوگئیں، انہوں نے خود کو گھر میں قرنطینہ کرلیا ہے۔
تفصیلات کے مطابق معروف اداکارہ اور ماڈل علیزے گبول نے سماجی رابطے کی ویب سائٹ ٹویٹر پر اپنے ٹویٹ میں بتایا کہ ان کا کوویڈ 19 کا ٹیسٹ مثبت آیا ہے۔
انہوں نے لکھا کہ شروع میں انہیں بخار تھا تاہم اب اس کی علامات کم ہیں۔ وہ ٹھیک ہیں اور انہوں نے خود کو گھر میں قرنطینہ کرلیا ہے، انہوں نے مزید کہا کہ وہ جلد صحت یابی کے لیے پرامید ہیں۔
Tested positive for COVID-19 earlier today, started with high temperature but having mild symptoms now, Alhamdullilah I’m fine and stable I’ve isolated myself at home, hoping for a speedy recovery InshAllah 🤲🏻
— Alyzeh Gabol (@IamAlyzehgabol) October 5, 2020
اس سے قبل متعدد فنکار کرونا وائرس کا شکار ہوچکے ہیں۔ 29 ستمبر کو فلم اور ڈراما انڈسٹری کے نامور اور سینئر اداکار مرزا شاہی کرونا وائرس کے باعث چل بسے تھے۔
علاوہ ازیں اداکارہ سکینہ سموں، ندا یاسر، یاسر نواز، روبینہ اشرف، گلوکار ابرار الحق، بلال مقصود، کامیڈین و میزبان شفاعت علی اور واسع چوہدری بھی وائرس کا شکار ہونے کے بعد صحت یاب ہوچکے ہیں۔
ملک میں اب تک کرونا وائرس کے مجموعی کیسز کی تعداد 3 لاکھ 18 ہزار 932 ہوچکی ہے جن میں سے 8 ہزار 904 فعال کیسز ہیں۔
کرونا وائرس سے 6 ہزار 570 اموات ہوچکی ہیں جبکہ 3 لاکھ 3 ہزار 458 مریض صحت یاب ہوچکے ہیں۔