الزاری جوزف اور جیسن ہولڈر نے زمبابوے بیٹنگ لائن کے دھجیاں اڑاتے ہوئے اپنی ٹیم کو فتح دلوادی۔
تفصیلات کے مطابق آسٹریلیا کے شہر گیلونگ میں کھیلے گئے کوالیفائنگ راؤنڈ کے آٹھویں میچ میں ویسٹ انڈیز نے ٹاس جیتا اور پہلے بیٹنگ کا فیصلہ کیا۔
کیئربین ٹیم نے مقررہ 20 اوورز میں 7 وکٹوں پر 153 رنز بنائے، جانسن چارلس نے جارحانہ بیٹنگ کرتے ہوئے 36 گیندوں پر 45 رنز کی عمدہ اننگز کھیلی،اس کے علاوہ رومن پوویل 28، ایون لیوس 15 اور کائل میئرز نے 13 رنز بنائے۔
زمبابوے کی جانب سے سکندر رضا نے 3 ، بلیسنگ مزاربانی 2 جبکہ شان ولیمز نے ایک وکٹ حاصل کی۔
ہدف کے تعاقب میں زمبابوے نےجارحانہ انداز اپنایا مگر فاسٹ بولر الزاری جوزف اور جیسن ہولڈر نے ان کی محنت پر پانی پھیر دیا، دونوں بولرز زمبابوے ٹیم پر قہر بن کر ٹوٹے اور مشترکہ طور پر سات وکٹیں لے اڑے۔
زمبابوے ٹیم 153 رنز ہدف کے تعاقب میں 122 رنز پر ڈھیر ہوگئی، جونگوے نے میچ کے اختتامی لمحات میں 29 رنز بناکر ٹارگٹ تک پہنچنے کی کوشش کی تاہم ناکام رہے۔
اس کے علاوہ ویسلی مدھویرے 27، ریان برل 18،سکندر رضا 14 جبکہ ریگیس چکابوا 13 رنز بناسکے۔
ویسٹ انڈیز کی جانب سے الزاری جوزف نے 4، جیسن ہولڈر نے 3 جبکہ عقیل حسین اور اوڈین اسمتھ نے ایک ایک وکٹ حاصل کی۔
