لاہور : پاکستان کے نامور کامیڈین لیجنڈ اور تھیٹر کے بادشاہ امان اللہ 70 برس کی عمر میں انتقال کرگئے، مرحوم گزشتہ کافی عرصے سے گردوں اور پھیپھڑوں کے مرض میں مبتلا تھے، ان کے انتقال پر وزیر اعظم عمران خان اور دیگر شخصیات نے افسوس کا اظہار کیا ہے ۔
تفصیلات کے مطابق ملک کی شوبز انڈسٹری کا بڑا نام اور کامیڈین لیجنڈ، مزاح کے شہنشاہ اور تھیٹر کے بادشاہ امان اللہ 70 برس کی عمر میں خالق حقیقی سے جاملے، انا للہ وانا الیہ راجعون ۔
امان اللہ لاہور کے ایک نجی اسپتال میں طویل عرصہ سے زیر علاج تھے، وہ گردوں اور پھیپھڑوں کی بیماری میں مبتلا تھے، امان اللہ کے بیٹے نے ان کے انتقال کی تصدیق کردی ہے۔
امان اللہ خان کے انتقال پر ملک کی تمام سیاسی سماجی اور شوبز کی شخصیات نے گہرے دکھ اور رنج کااظہارکیا ہے، وزیراعظم عمران خان نے کامیڈین امان اللہ کے انتقال پر گہرے دکھ کا اظہار کرتے ہوئے مرحوم کے درجات بلندی اور لواحقین کیلئے صبر کی دعا کی، مرحوم امان اللہ اسٹیج، مزاحیہ اداکاری اور ڈرامہ انڈسٹری کا قیمتی اثاثہ تھے۔
اس کے علاوہ وزیراطلاعات پنجاب فیاض الحسن چوہان نے معروف کامیڈین امان اللہ کی وفات پر اظہار افسوس کرتے ہوئے کہا کہ اللہ تعالیٰ مرحوم کو جنت الفردوس میں اعلیٰ مقام عطا فرمائے۔
انہوں نے کہا کہ امان اللہ عوام کے دلوں میں بستے ہیں، امان اللہ پاکستان میں فن مزاح کے بانیوں میں سے تھے، امان اللہ کی وفات سے پیدا خلا کبھی پورا نہیں ہوسکے گا، تمام کامیڈی فنکاروں نے امان اللہ سے سیکھا ہے۔
امان اللہ لاہور کے ایک نجی ہسپتال میں طویل عرصہ سے زیر علاج تھے، وہ گردوں اور پھیپھڑوں کی بیماری میں مبتلا تھے۔ سینئر اداکار سہیل احمد کے مطابق ا مان اللہ کے بیٹے نے ان کے انتقال کی تصدیق کردی ہے۔
مرحوم مزاحیہ اداکار امان اللہ نے اسٹیج ڈراموں کے علاوہ ٹی وی ڈراموں ، فلموں اور نیوز چینلز پر چلنے والے مزاحیہ پروگراموں میں شاندار کارکردگی کا لوہا منوایا، وہ دوران علالت بھی پھلجھڑیاں چھوڑ کر اپنی شگفتہ مزاجی کا ثبوت دیتے رہے۔
