ہالی ووڈ اداکارہ امبر ہرڈ نے سابق شوہر و اداکار جانی ڈیپ کے ٹک ٹاک ڈیبیو پر ردعمل دے دیا۔
سابقہ اہلیہ امبر ہرڈ کے خلاف ہتک عزت کا مقدمہ جیتنے کے بعد جانی ڈیپ اپنی زندگی کے ساتھ آگے بڑھ رہے ہیں۔ شاہانہ ریستوراں میں جشن منانے سے لے کر ٹک ٹاک پر اپنا اکاؤنٹ شروع کرنے تک ان کے کیریبین کے پائریٹس اداکار نے دھوم مچا رکھی ہے۔
تاہم ایسا لگتا ہے کہ جانی کا جشن منانا امبر ہرڈ کو ایک آنکھ نہ بھایا جبکہ انہوں نے ابھی تک اپنے سابق شوہر جانی ڈیپ کو 10 ملین ڈالر سے زیادہ کی ادائیگی نہیں کی ہے۔
جانی ڈیپ کی جانب سے اپنے مداحوں کا شکریہ ادا کرنے کے لیے ایک ٹک ٹاک ویڈیو جاری کی گئی تھی جس میں اُنہوں نے اشارہ دیا تھا کہ وہ اب اپنی زندگی میں آگے بڑھ رہے ہیں۔
View this post on Instagram
جانی ڈیپ کی یہ پوسٹ اور ٹک ٹاک ویڈیو ایمبر ہرڈ کو کچھ خاص نہیں بھائی اور اُنہوں نے اپنا ردِ عمل اپنے ترجمان کے ذریعے میڈیا تک پہنچایا جسے ویب سائٹ ’ٹوڈے ڈاٹ کام‘ نے شائع کیا۔
ایمبر ہرڈ کا اپنے ردِ عمل میں کہنا تھا کہ ’جیسا کہ جانی ڈیپ نے کہا ہے کہ وہ آگے بڑھ رہے ہیں، اُن کے آگے بڑھنے سے خواتین کے حقوق پسماندگی کی طرف (پیچھے) جا رہے ہیں۔‘
انہوں نے عدالتی فیصلے پر تنقید کرتے ہوئے مزید کہا کہ ’گھریلو تشدد کا شکار ہونے والوں کے لیے عدالت کا فیصلہ یہ ہے کہ وہ اپنے حقوق کے لیے کھڑے ہونے اور بولنے سے ڈریں۔‘
واضح رہے کہ گزشتہ روز امریکی اداکار جانی ڈیپ نے مداحوں کی بے پناہ محبت اور حمایت کا شکریہ ادا کرنے کے لیے اپنی پہلی ٹک ٹاک ویڈیو شیئر کی تھی۔