دور حاضر میں پاکستانی معاشرے میں طلاق کے رجحان میں کافی حد تک اضافہ ہوا ہے، جس کے سبب خواتین کو اپنی آنے والی زندگی بہتر بنانے کیلئے بے انتہا تگ و دو کرنا پڑتی ہے۔
ایسی صورتحال میں باہمت خواتین درپیش حالات کا مقابلہ کامیابی سے کرتی ہیں اور اپنے بچوں کے تابناک مستقبل کیلئے بھرپور جدوجہد کرکے انہیں بھی معاشرے ک اایک قابل انسان بناتی ہیں۔
پاکستان کی شوبز انڈسٹری سے وابستہ ایک ایسی ہی حوصلہ مند خاتون اداکارہ امبر خان نے اے آر وائی ڈیجیٹل کے پروگرام گڈ مارننگ پاکستان میں شرکت کی اور طلاق کے بعد کی زندگی میں پیش آنے والے نشیب و فراز کے حوالے سے ناظرین کو آگاہ کیا۔
انہوں نے بتایا کہ میری شادی بہت چھوٹی عمر میں ہوئی اور شادی کے 20 سال بعد مجھے طلاق ہوئی اس وقت میری دو بیٹیاں تھیں ایک کی عمر 12سال جبکہ دوسری چار یا پانچ سال کی تھی۔
میرے سسرال والے آج بھی میری عزت کرتے ہیں اور میں بھی اپنے ساس سسر کو اپنے والدین کا درجہ دیتی ہوں اسکے علاوہ میری نندوں سے بھی اچھے تعلقات ہیں۔
امبر خان نے بتایا کہ میں ایک مکمل طور پر گھریلو خاتون تھی، میں نے شادی کے بعد شوبز جوائن کیا کیونکہ میرے شوہر نے کہا کہ اب خود جاکر کماؤ، اس وقت میری بڑی بیٹی 7سال کی تھی۔
ان کا کہنا تھا کہ پھر میں نے بہت محنت کی اور یہ پرواہ نہیں کی کہ لوگ کیا کہیں گے؟ اور آج میں اس مقام پر ہوں کہ میں نے بچیوں کی پرورش بھی اچھے طریقے سے کی ہے۔
