کراچی : شہر قائد کے پوش علاقے میں ایمبولینس میں سوار ملزمان پھل فروش کو لوٹ کر فرار ہوگئے۔
تفصیلات کے مطابق کراچی کے پوش علاقے میں ایمبولینس کے ذریعے ڈکیتی کی واردات ہوئی ، جہاں ایمبولینس میں سوار ملزمان بڑے ہتھیار کے ساتھ پھل فروش کو لوٹ کر فرارہوگئے۔
متاثرہ شخص نے بتایا ایمبولینس میں مسلح ملزمان آئے اور ٹھیلا لگانے سے منع کیا ، جس کے بعد مسلح شخص مجھےکچھ فاصلے پر لے کر گیا اور پیسے چھین لیے۔
ایمبولینس میں اسٹریٹ کرائم کی واردات کی فوٹیج اے آروائی نیوز کو موصول ہوگئی ہے۔
متاثرہ پھل فروش نے قانونی کارروائی کیلئے پولیس سےرابطہ کرکے کلفٹن تھانے میں ڈکیتی کی واردات کی رپورٹ درج کرادی۔
یاد رہے رواں سال فروری میں شہر قائد میں ایمبولینس کے ذریعے منشیات کی اسمگلنگ کا انکشاف سامنے آیا تھا ، پولیس نے ایمبولینس کے خفیہ خانے میں چھپائی گئی منشیات کی اسمگلنگ ناکام بنا دی تھی۔
