لاہور : امیر جماعت اسلامی سینیٹر سراج الحق نے کہا ہے کہ ہمیں کسی وڈیرے کی غلامی کے لئے پیدا نہیں کیا گیا، وسائل کی منصفانہ تقسیم سے ملک کے مسائل حل ہوسکتے ہیں۔
یہ بات انہوں نے لاہور میں جے آئی کسان کی افتتاحی تقریب سے خطاب کرتے ہوئے کہی، انہوں نے کہا کہ ایسا پاکستان چاہتے ہیں جس میں انصاف سب کیلئے ہو، ملک میں غریب کے لیے علاج ناممکن ہے، ملک کا ہر بچہ ورلڈ بینک کا مقروض اور معیشت تباہ ہورہی ہے۔
رزق حلال بند، کرپشن اور سود کے دروازے کھلے ہیں، سراج الحق کا کہنا تھا کہ ہمیں کسی وڈیرے کی غلامی کے لئے پیدا نہیں کیا گیا، آج ملک کی سیاست پر بھی شوگر مافیا کا قبضہ ہے، وسائل کی منصفانہ تقسیم سے مسائل حل ہوسکتے ہیں، اس معاشرے میں انسان آزاد نہیں سب غلام ہیں۔
ایک سوال کے جواب میں امیرجماعت اسلامی نے کہا کہ زرمبادلہ میں کسانوں کا بڑا حصہ ہے لیکن ان کے لئے کوئی بڑا معاشی پروگرام نہیں، کسانوں کی خون پسینے کی کمائی حکومت میں بیٹھے جاگیردار اور وڈیرے ہڑپ کر جاتے ہیں، انہیں سستے بیج، کھاد، اور دوا کی ضرورت ہے قوم کا مطالبہ انڈا یا مرغی نہیں۔
انہوں نے کہا کہ ایوانوں میں موجود لوگ کسانوں کے نہیں ایلیٹ کلاس کے نمائندے ہیں جو خود کو کسی کے سامنے جوابدہ نہیں سمجھتے،کسانوں کو گنے کی قیمت اس لیے نہیں ملتی کہ سیاست پر بھی شوگر مافیا کا قبضہ ہے۔
حکومت کہتی ہے کہ کسان ماتھے کا جھومر ہے لیکن اسے عزت نہیں دی جاتی، ہم اپنے ملک کی ترقی چاہتے ہیں تو کسان اور مزدور کے بچے کو تعلیم لازمی دلانا ہوگی، غربت نے بچوں کو مختلف طبقوں کے اسکولوں میں تقسیم کردیا۔
