امیرجماعت اسلامی سراج الحق نے 22 مئی کو اقوام متحدہ کے دفتر کے سامنے پُرامن احتجاجی مظاہرے کا اعلان کیا ہے ان کا کہنا ہے کہ سری نگر میں جی20اجلاس عالمی قوانین کی خلاف ورزی ہے۔
لاہور میں میڈیا سے گفتگو کرتے ہوئے سراج الحق نے کہا کہ سری نگر میں عالمی نوعیت کا اجلاس بین الاقوامی قوانین کی خلاف ورزی ہے، متنازع علاقے میں جی20اجلاس پاکستان کی خارجہ پالیسی کی ناکامی ہے۔
انہوں نے کہا کہ ہمارے حکمران بھارتی ہٹ دھرمی کو مؤثر انداز میں اجاگر نہیں کرسکے، حکومت اجلاس کے خلاف لابنگ کرنے میں ناکام رہی۔
امیرجماعت اسلامی کا کہنا تھا کہ مقبوضہ کشمیر جیل خانے میں بدل چکا ہے،جی20اجلاس جیل میں ہوگا، 22مئی کو سری نگر میں جی20اجلاس پر کشمیری اسلام آباد میں احتجاج کریں گے۔
سراج الحق نے بتایا کہ پُرامن احتجاج اقوام متحدہ کے دفتر کے سامنے ہوگا جس میں یاد داشت پیش کی جائیگی، مقبوضہ کشمیر میں کشمیریوں کی نسل کشی جاری ہے، بھارت کشمیری مسلمانوں کی اکثریت کو اقلیت بنانا چاہتا ہے۔
یاد رہے کہ مقبوضہ کشمیر میں جی 20 اجلاس کے خلاف واشنگٹن میں ڈیجیٹل ٹرک پر آگاہی مہم چلائی گئی، ورلڈ کشمیر اویئرنس فورم نے واشنگٹن میں آگاہی مہم کے لیے ڈیجیٹل ٹرک کا اہتمام کیا۔
ڈیجیٹل ٹرک سے مقبوضہ کشمیر میں بھارتی مذموم مقاصد کو بے نقاب کیا گیا، اور پیغام دیا گیا کہ جی 20 اجلاس اقوام متحدہ کی قراردادوں کے خلاف ہے۔
