واشنگٹن / لندن : یورپ اور امریکا میں سردی کا راج برقرار ہے، شدید برفباری نے متعدد علاقوں کو اپنی لپیٹ میں لے لیا۔ امریکی ریاست ارویگن میں برفباری کے باعث اسکول کی چھت گرگئی اور ایک ٹرین بھی پٹڑی سے اتر گئی۔
تفصیلات کے مطابق دنیا بھر میں سردی کاراج برقرار ہے۔ یورپ اورامریکا بدستور سرد موسم اور برفباری کی لپیٹ میں ہیں، سربیا میں درجہ حرارت منفی بیس ڈگر ی تک گرگیا۔ خون جما دینے والی ٹھنڈ تارکین وطن کے لیے عذاب بن گئی۔ شدید سردی نے مہاجرین کی مشکلات میں اضافہ کردیا۔
جرمنی، رومانیہ، بلغاریہ، اٹلی میں سردی سے نظام زندگی منجمد ہو کر رہ گئی، چین میں شدید برفباری سے سمندر پر برف کی تہہ جم گئی، برطانیہ میں بھی سردی کی لہر جاری جاری ہے۔
برفباری کے باعث ہائی ویز بلاک گاڑیوں کی قطاریں لگ گئیں، امریکی ریاست اوریگن میں شدید برفباری کے باعث اسکول کی چھت گرگئی تاہم کوئی جانی نقصان نہیں ہوا۔ کئی فٹ برف پڑنے سے ٹرین ٹریک سے اتر گئی۔
امریکی ریاست اوہائیو میں شدید بارشیں اور سیلاب کے باعث نظام زندگی درہم برہم اور سڑک ڈھے گئی۔
