واشنگٹن: مشرقی وسطیٰ میں امن کے لیے امریکی اقدام کی مذمت کرنے پر امریکا نے واشنگٹن میں فلسطین لبریشن آرگنائزیشن(پی ایل او) کا دفتر بند کرنے کا حکم دے دیا۔
تفصیلات کے مطابق امریکا کی جانب سے حکم دیا گیا ہے کہ دارالحکومت واشنگٹن میں پی ایل او کا دفتر بند کردیا جائے، پی ایل او نے امریکا کے ساتھ کام کرنے پر انکار بھی کردیا تھا۔
ترجمان امریکی محکمہ خارجہ ہیدرنوئرٹ نے اپنے جاری کردہ بیان میں کہا ہے کہ پی ایل او کو واشنگٹن میں دفتر کی اجازت فلسطین اور اسرائیل کے درمیان بامعنی مذاکرات کے لیے دی گئی تھی۔
انہوں نے کہا کہ اسرائیل سے بامعنی مذاکرات کے لیے فلسطین لبریشن آرگنائزیشن نے اقدامات نہیں اٹھائے، پی ایل او نے مشرق وسطیٰ میں امن کے لیے امریکی اقدام کی مذمت بھی کی۔
امریکا کا فلسطینی اسپتالوں کی امداد میں کٹوتی کا اعلان
ہیدرنوئرٹ کا کہنا تھا کہ پی ایل او نے امن کے لیے امریکا سے کام کرنے سے انکار کیا، اسرائیل اور فلسطین میں براہ راست مذاکرات معاملے کو آگے بڑھا سکتے ہیں۔
خیال رہے کہ گذشتہ روز امریکا نے فلسطینی اسپتالوں میں دی جانے والی امدادی رقم میں سے تقریباً 25 ملین ڈالر کی کٹوتی کا اعلان کیا ہے۔
امریکی حکام کا کہنا تھا ہے کہ یہ رقم اب دیگر ترجیحی منصوبوں کو منتقل کردی جائے گی، جہاں اسے بہتر انداز میں خرچ کیا جائے گا۔
خیال رہے کہ اس سے قبل بھی امریکی محکمہ خارجہ نے فلسطینیوں کے لیے بیس کروڑ ڈالرز کی سالانہ مختلف امداد روک لینے کا اعلان کیا تھا، مذکورہ اقدام بھی امریکی صدر کے کہنے پر سامنے آیا تھا۔
