واشنگٹن: ترجمان امریکی محکمہ خارجہ ہیدرنوئرٹ نے کہا ہے کہ امریکا پاکستان میں شفاف انتخابات کے انتعقاد کی مکمل حمایت کرتا ہے، امید ہے پاکستان میں اقتدار کی منتقلی کا مرحلہ احسن طریقے سے ہوگا۔
ان خیالات کا اظہار انہوں نے امریکی دار الحکومت واشنگٹن میں پریس بریفنگ دیتے ہوئے کیا، ہیدرنوئرٹ کا کہنا تھا کہ پاکستان میں تاریخی انتخابی اصلاحات بل کی بھی حمایت کرتے ہیں، پہلا موقع ہے کہ پاکستان میں ایسے قانون پر عمل در آمد کیا جارہا ہے۔
انہوں نے کہا کہ پاکستان میں ہونے والے عام انتخابات کے حوالے سے امریکا کی حمایت حاصل رہے گی، امید ہے انتخابات کے بعد پاکستان میں اقتدار کی منتقلی کا مرحلہ بھی احسن طریقے سے مکمل ہوگا۔
ملزم کرنل جوزف کومکمل استثنیٰ حاصل نہیں‘ اسلام آباد ہائی کورٹ
پریس بریفنگ کے دوران ترجمان امریکی محکمہ خارجہ نے کرنل جوزف سے متعلق سوال پر جواب سے گریز کیا، اس موقع پر ان کا کہنا تھا کہ امریکی سفارت کار کی گاڑی سے حادثے پر ابھی کہنے کو کچھ نہیں ہے۔
یاد رہے کہ گزشتہ ماہ 7 اپریل کو امریکی ملٹری اتاشی نے اسلام آباد کے علاقے بارہ کہو کے قریب سگنل توڑ کر موٹرسائیکل سوار دو افراد کو کچل دیا تھا۔
عام انتخابات 25 جولائی کو ہوں گے، صدر ممنون حسین نے منظوری دے دی
حادثے میں عتیق بیگ نامی نوجوان موقع پرجاں بحق اور اس کا کزن شدید زخمی ہوگیا تھا جبکہ پولیس نے سفارتی استثنیٰ کے باعث کرنل جوزف کو جانے کی اجازت دی تھی۔
واضح رہے کہ پاکستان میں عام انتخابات رواں سال 25 جولائی کو ہونے جارہے ہیں جس کے لیے تاریخ کی منظوری صدر مملکت ممنون حسین کی جانب سے دے دی گئی ہے۔
خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔
