اسلام آباد: سیلاب متاثرین کی بحالی اور تعمیر نو سے متعلق امریکی امداد کے اعداد و شمار جاری کردیئے گئے، ترجمان امریکی سفارتخانہ کے مطابق بحالی و تعمیر نو کی کوششوں میں پاکستان کے شانہ بشانہ کھڑے ہیں۔
امریکی سفارتخانہ کے مطابق سیلاب متاثرین کی بحالی، قدرتی آفات سے نمٹنے میں بھرپور تعاون فراہم کیا گیا، متاثرین کی بحالی، غذائی تحفظ کیلئے 21 کروڑ 50 لاکھ ڈالرکی امداد فراہم کی گئی۔
ترجمان امریکی سفارتخانہ کا کہنا ہے کہ یوایس ایڈ کے توسط سے8 کروڑ ڈالرز خوراک، صحت پرخر چ کیے گئے، یوایس ایڈصاف پانی اوررہائش کی فراہمی پرخرچ کی گئی۔
انہوں نے کہا کہ جنیوا کانفرنس میں امریکا نے بحالی، تعمیر نو کیلئے 10 کروڑ ڈالر فراہمی کااعلان کیا، کاشتکاروں کی فوری بحالی کیلیے ایک کروڑ ڈالر فراہم کیے گئے۔
افغان مہاجرین،ان کی میزبان مقامی آبادیوں کیلئے یو این ایچ سی آرکو 20 لاکھ ڈالر فراہم کیے گئے، امریکی محکمہ دفاع کو19 لاکھ ڈالرادا کرتے ہوئے یوایس ایڈ کا امدادی سامان متاثرین تک پہنچا یا گیا۔
امریکی سفارتخانہ کے مطابق قدرتی آفات سے نمٹنے کی استعداد کار بڑھانے کیلئے 30 لاکھ ڈالر کی رقم دی گئی، جبکہ 40لاکھ سے زائد شہریوں کو ہنگامی بنیاد پر خوراک فراہمی کیلئے 16.4 ملین ڈالر کی اضافی امداد دی گئی۔
اس کے علاوہ امریکی شہریوں،کمپنیوں نے امدادی کوششوں میں بھرپور حصہ لیا، امریکی شہریوں اور کمپنیوں نے 3 کروڑ 70 لاکھ ڈالر کا عطیہ بھی فراہم کیا۔
