امریکی فوج کے سابق جنرل گورڈن ڈیوس نے اعتراف کرتے ہوئے کہا ہے کہ ایف 16 طیارے روسی فوجی طیاروں مقابلہ نہیں کر سکتے۔
غیر ملکی میڈیا کے مطابق امریکی فوج کے سابق جنرل گورڈن ڈیوس نے اپنے ایک انٹرویو میں روس کی برتری کا اعتراف کرتے ہوئے یہ تہلکہ خیز انکشاف کیا ہے کہ یوکرین نے جو ایف 16 طیارے اپنے اتحادیوں سے حاصل کیے ہیں وہ جنگی صلاحیتوں کے لحاظ سے روسی فوجی طیاروں کا مقابلہ نہیں کر سکتے۔
جنرل ڈیوس نے مزید کہا کہ ایف سولہ طیاروں میں رینج اور دیکھنے کی صلاحیت میں کمزوری کے ساتھ ساتھ کچھ مسائل ہیں اور ان طیاروں پر ہم جو بہترین سسٹم لگا سکتے ہیں وہ بھی انہیں روسی طیاروں سے برتر نہیں بنا سکتے.
امریکی ریٹائرڈ جنرل کا کہنا تھا کہ روس کے پاس کئی سو جدید جنگی طیارے ہیں، جن میں سخوئی 35 سپر مینیوور ایبل ایئر برتری فائٹر، سخوئی 35 ایس ایم ملٹی رول جیٹ اور مگ 31 سپرسونک انٹرسیپٹر طیارہ شامل ہیں۔
واضح رہے کہ روس کے فوجی آپریشن کے آغاز کے بعد سے مغربی ممالک نے یوکرین کے لیے اپنی فوجی اور مالی امداد میں اضافہ کر دیا ہے۔
دوسری جانب ماسکو نے بارہا اس حوالے سے مغربی ممالک کو خبردار کر چکا ہے کہ یوکرین کو ہتھیاروں کی فراہمی سے معاملہ ٹھنڈا نہیں بلکہ تنازع بڑھے گا۔
