site
stats
عالمی خبریں

امریکی سینیٹ نے کرسٹوفررے کو نیا ایف بی آئی چیف منتخب کرلیا

واشنگٹن : امریکی سینیٹ نے بھاری اکثریت سے کرسٹوفر رے کی ایف بی آئی کے نئے سربراہ کی حیثیت سے تقرری کی حتمی منظوری دے دی ہے۔

واشنگٹن سے جہاں زیب علی کی رپورٹ کے مطابق امریکی سینیٹ نے صدر ڈونلڈ ٹرمپ کی جانب سے نامزد کردہ نئے ایف بی آئی ڈائریکٹر کرسٹوفر رے کی تقرری کی حتمی منظوری دے دی ہے۔

پچاس سالہ کرسٹوفر رے جیمز کومی کی جگہ سنبھالیں گے جنہیں صدر ٹرمپ نے رواں سال مئی میں ان کے عہدے سے برطرف کر دیا تھا، سینیٹ میں کرسٹوفر رے کے حق میں 92 جبکہ مخالفت میں پانچ ووٹ آئے۔

ڈیموکریٹ سینیٹرز کرسٹن گلی برینڈ، الیزبتھ وارن، ران وائیڈن، ایڈ مارکی اور جیف میرکلے نے کرسٹوفر کی مخالفت میں ووٹ دیا۔

واضح رہے کہ کرسٹوفر رے کی تقرری ایسے وقت میں عمل میں آئی ہے جب امریکی تحقیقاتی ادارے امریکی صدارتی انتخابات میں روس کی مبینہ مداخلت اور صدر ٹرمپ کی انتخابی مہم کے منتظمین کے روس کے ساتھ مبینہ رابطوں کی تحقیقات کر رہے ہیں۔

صدر ٹرمپ پر الزام ہے کہ انہوں نے جیمز کومی کو اسی تحقیقات کی وجہ سے عہدے سے برطرف کیا تھا تاہم کرسٹوفر رے جو روس اور ٹرمپ کے قریبی ساتھیوں کیخلاف تحقیقات جاری رکھیں گے۔

ان کا کہنا ہے کہ وہ سیاسی وابستگی سے بالاتر ہوکر اپنی ذمہ داریاں انجام دیں گے، ایف بی آئی کے نئے ڈائریکٹر کرسٹوفر رے ایک سینئر وکیل ہیں جنہیں قومی سلامتی کے حوالے سے مقدمات کا وسیع تجربہ ہے، نئے ایف بی آئی ڈائریکٹر جارج ڈبلیو بش کی حکومت میں نائب اٹارنی جنرل کے طور پر بھی خدمات انجام دے چکے ہیں۔

Print Friendly, PDF & Email
20

Comments

comments

اس ویب سائیٹ پر موجود تمام تحریری مواد کے جملہ حقوق@2018 اے آروائی نیوز کے نام محفوظ ہیں

To Top